(NLTimes) – Autoridadnan na Hulanda lo sigui cu plan pa usa base di dato priva di DNA pa yuda resolve casonan criminal serio unda cu no a haci ningun avance. Ministerio Publico (OM) y Netherlands Forensic Institute (NFI) tin plan di usa e base di dato di DNA for di agencianan comercial cu ta colecta e muestranan aki di clientenan cu kier haci investigacion genetico.
Autoridadnan ta spera cu nan lo por usa un rango mas amplio di muestranan genetico pa por haya familiarnan cercano of distante di personanan involucra den crimen, nan a anuncia dialuna. “Na Merca, e metodo aki a ser usa prome den aña 2018, y ya caba a causa un avance den mas o menos 550 caso cu tabata stanca,” OM a splica. Tambe nan a alega cu autoridadnan di Suecia a usa e metodo pa resolve un asesinato den aña 2004 y cu investigadornan Noruego a logra resolve un caso di aña 1999.
OM y NFI kier a cuminsa cu dos casonan Hulandes unda ta trata di asesinato pa mira si e metodo tambe lo causa un avance na Hulanda. No a revela detaye di niun di e dos crimen, sinembargo tin material di DNA di un sospechoso desconoci den un di e caso, y e otro caso ta trata di un victima cu te ainda no a identifica. “Si e test ta exitoso, ciertamente nos lo mira posibilidad di usa e metodo aki den otro casonan sumamente serio cu ta cumpli cu e criterio necesario pa haci uso di e metodo aki.”
Pa awo, OM y NFI lo usa e base di dato di DNA di GEDmatch y FamilyTreeDNA, dos compania comercial na Merca. Nan a selecta e negoshinan aki pa motibo cu hopi persona Hulandes ta manda nan dato pa motibo cu hopi di e residentenan na Merca tin raiznan Europeo. Adicionalmente, nan ta permiti nan usuarionan duna nan consentimento pa permiti autoridadnan usa nan DNA pa yuda resolve investigacionnan criminal.
