Reguladonan di Union Europeo a habri dos investigacion ayera, riba e tienda di app mobil di Apple y su plataforma di pago, tocante preocupacion cu su practicanan ta distorciona competencia, habriendo un frente nobo den e bataya di UE contra e dominio di companianan tecnologico grandi.

Comision ehecutivo di UE a bisa cu a lansa e investigacionnan formalmente pa motibo di preocupacion cu e forma cu Apple ta haci negoshi ta daña consumidornan door di limita escogencia y innovacion y teniendo e prijsnan halto. Apple a rechasa e acusacion como ‘sin base’.

E comision ta examinando si e reglanan di Apple Pay ta rekeri tiendanan online pa haci esaki e opcion preferi of default, efectivamente lagando afo sistema di pago rival. Tambe ta investigando preocupacion cu ta limita acceso pa sistema di pago rival riba e funcion wireless ‘tap and go’ riba iPhone.

E comision a habri un di dos investigacion riba App Store tocante preocupacion cu Apple ta forsa desaroyadonan pa usa e sistema di compra propio di e compania, cu ta cobra nan un comision di 30%, y ta restringi nan di bisa usuarionan di iPhone y iPad tocante formanan nobo pa paga pa servicionan digital manera suscripcion na musica. E investigacion ta follow up kehonan di servicio di streaming di musica, Spotify, y un distribuido di e-books riba e impacto di e reglanan di competencia di e App Store.

“Ta parce cu Apple a obtene un rol di ‘gatekeeper’ ora ta trata di distribucion di app yu contenido na usuarionan di aparatonan popular di Apple”, vicepresidente ehecutivo di UE, Margrethe Vestager a bisa. Reguladonan kier sigura cu e practicanan di Apple no ta afecta competencia den mercadonan unda ta competi cu otro fabricantenan di app, el a bisa, citando su servicio di streaming di musica y di e-books.

Tambe ta importante ‘pa medidanan di Apple no nenga consumidonan e beneficionan di tecnologia nobo di pago, incluyendo miho escogencia, calidad, innovacion y prijs competitivo’, el a bisa, notando cu crisis di coronavirus a acelera e crecemento den industria di pago mobil mientras mas hende ta haci pago online of ‘sin contacto’ na tiendanan.

Apple a rechasa e acusacionnan, bisando cu a crea producto- y servicionan nobo den e mercadonan mas competitivo di mundo.