(AP) – Un proposicion pa crea un di e nacion su prohibicion mas fuerte contra menornan su uso di rednan social ta na caminda pa gobernador republicano di Florida Ron DeSantis, ken a expresa preocupacion tocante e legislacion pa mantene muchanan bao e edad di 16 fuera di plataformanan popular sin importa si tin aprobacion di e mayornan of no.
E Cas a aproba e proposicion cu un voto di 108 – 7 diahuebs oranan despues cu e Senado a aproba esaki cu 23 – 14. E Senado a haci cambionan na e proposicion original, cual republicano Paul Renner a bisa cu e ta spera lo atende DeSantis su preguntanan tocante privacidad.
E proposicion ta bay den contra di cualkier plataforma di rednan social cu ta mantene record di actividad di usuario, permiti muchanan publica material y interactua cu otronan y ta usa funcionnan adictivo diseña pa causa uso compulsivo of excesivo. Sostenedor ta señala na e tasa di suicidio entre muchanan, cyberbullying y predadornan cu ta usa rednan social pa yega na victimanan. “Nos ta papiando di negoshinan cu ta haci uso di funcionnan adictivo pa tin un manipulacion en masse di nos muchanan pa causa nan daño,” e proposicion su sponsor den Senado, Republicano Erin Grall a comenta.
Otro estadonan a considera legislacion similar sinembargo mayoria no a propone un prohibicon total. Na Arkansas, un hues federal a blokia un ley den augustus cu lo rekeri consentimento di e mayor pa un menor crea un cuenta nobo riba rednan social. Sostenedornan na Florida ta spera cu si e proposicion bira un ley, e lo logra mantene contra desafionan legal pa motibo cu esaki lo prohibi rednan social cu ta basa riba funcionnan adictivo manera alerta di notificacion y videonan cu ta cuminsa automaticamente na luga di e contenido di e sitionan aki. Sinembargo e oponentenan ta bisa cu esaki ta den violacion di First Amendment y cu mester ta den man di mayornan, no gobierno, monitor e uso di rednan social di muchanan.
“Esaki no ta aña 1850. Mientras e mayornan ta presenta na reunionnan di scol pa prohibi bukinan, nan yiunan ta na cas riba nan iPad ta mira cosnan malo,” Senador Democratico Jason Pizzo a comenta. El a bisa sarcasticamente cu legisladornan tin otro opcionnan si nan kier cria yiu di otro hende. “Ban tin un proposicion cu ta encurasha pasa tempo cu bo yiunan, cushina cuminda, come na mesa cu otro, interactua cu otro, yama wela wak si e ta bon de bes en cuando,” el a comenta. E legislacion tin un mescla di Republicano y Democrata na ambos banda di e problema.
DeSantis a bisa cu e ta compronde cu e plataformanan por ta dañino pa muchanan pero tambe a enfatisa cu e mayornan mester hunga un rol den monitor e uso. “Nos no por bisa cu 100 porciento di e usonan ta malo paso nan no ta,” DeSantis a bisa prome cu e proposicion a keda aproba. “Mi no ta kere cu e ta na e punto ey ainda, pero mi ta spera cu nos por yega na un manera cu ta atende e mayornan su preocupacionnan.”
Sinembargo Renner, ken a haci e problema su prioridad top legislativo, ta pensa cu e gobernador lo aproba e producto final pa motibo cu esaki ta atende su preocupacionnan tocante anonimidad di e usuario.
Algun mayor tambe tin sentimentonan mescla cu esaki.
Angela Perry, un mama di Florida, a bisa cu e ta compronde e logica tras e proposicion y cu su persona y su casa no a laga su yiu subi ningun plataforma te ora cu el a cumpli 15 aña pero tambe ta considera cu ta keda na cada mayor pa tuma e decision aki basa riba e nivel di madurez di nan yiu. “Kico a pasa na e derechonan di mayornan? Perry a comenta. “Ya caba bo ta scoge ki bukinan mi yiu ta lesa na scol. Esaki ta aceptabel te cierto punto, pero awo tambe bo ta drentando nan bida priva. Esaki ta birando algo intruso.”
E proposicion aki lo rekeri pa companianan di rednan social cera cualkier cuenta cu ta kere ta usa pa menornan y pa cancela cuentanan bao peticion di un mayor of menor di edad. Cualkier informacion tocante e cuenta aki mester keda kita.
