(Infobae) – Instituto Nacional di Salud (INS) diamars ultimo a confirma e circulacion di un variante nobo di Covid-19 denomina JN.1, e cual a lanta un inkietud na nivel mundial.
E cepa aki a ser identifica como e variante dominante na Merca y a genera un aumento significativo di casonan na varios region na mundo. Na e pais nort Americano, autoridadnan di salud a mira un aumento di casonan notabel den ultimo simannan, siendo e variante JN.1 esun responsabel di e pik aki.
E variante aki a ser detecta pa prome biaha na september 2023 y cuatro luna despues a ser confirma na Colombia. Un di e aspectonan cu ta preocupa organisacionnan sanitario internacional ta cu a causa e aumento mas grandi di casonan for di Omicron, detecta na 2022. Organisacion Mundial di Salud a califica e variante aki como esun di interes debi na su plamamento hopi lihe, na Italia, por ehemplo, variante JN.1 tambe a ser vincula cu aumento di contagio for di ultimo siman di december.
Den un comunicado INS a splica cu aumento di casonan di infeccion respiratorio na henter e pais ta comun durante ultimo trimester di aña, specialmente na december y januari, debi na un mayor interaccion social, fenomenonan di clima y yegada di biaheronan for di Europa y Merca. Sinembargo, cada biaha cu ta aparece un variante den circulacion, autoridadnan ta pone atencion riba su caracteristicanan y su riesgo potencial.
Durante prome siman di januari na Bogota a registra un aumento di 23% di casonan di Covid-19 compara cu ultimo siman di december di 2023, segun Secretaria di Salud, ta conoci cu e capital Colombiano ta conta cu 256 caso activo di e malesa aki te 10 di januari 2024.
Ministerio di Salud Colombiano a adverti cu ocupacion di cama di ICU na Colombia ta cerca di supera 65% di su capacidad. Aunke e situacion aki no ta implica un riesgo inminente, autoridadnan di salud ta pidi na ciudadanonan pa utilisa mondmask y mantene e constante labamento di man, reforsando medidanan di cuido implementa durante pandemia.
