Autoridadnan a logra intercepta boto cu a drenta cu indocumentadonan y droga

Ayera den oranan di marduga, un biaha mas indocumentadonan a logra drenta Aruba cu boto na unda ademas a haya bultonan di droga, un situacion cu ta refleha pakico ta importante pa keda vigila e fronteranan cu nos pais bisiña, Venezuela, cu proximamente ta bay celebra un eleccion presidencial hopi cuestiona ora a exclui di participa e principal lider opositor Maria Corina Machado.

Diamars madruga polisnan di e team di aresto y otro patruyanan tabata prepara pa un lote di droga cu indocumentadonan cu lo tabata bay drenta.

Tabata den oranan di marduga cu e boto a drenta minuciosamente na Urirama segun nos fuente di suceso a reporta na Bon Dia Aruba.

Polisnan a drenta accion durante e yegada di e boto pero asina mes mas di 10 persona a logra subi tera y cu ayudo di algun persona na Aruba a logra recoge parti di e bultonan cu a drenta.

Durante e buskeda aki a polis a logra confisca gran parti di e droga y tambe a haci detencion. Den e operativo aki a haci uso di patruyanan di tur districto hunto cu e team di aresto, Kustwacht y tambe Guarda Nos Costa.

Polisnan tabatin conocemento di e accion aki prome cu nan yegada y tabata preparando e plan pero e movecion a sosode poco mas prome cu a spera y asina mes autoridad a mobilisa den pura cu patruyanan y a dirigi nan mes na Urirama hayando movecionnan sosodiendo. Algun a logra scapa pero a haci detencion di algun persona.

Igualmente a informa cu den oranan di dia di ayera Polis tambe a haya personanan indocumenta canando den area di Noord (Kamay) y a hiba e personanan aki na warda pa controla nan status migratorio na Aruba.

Na december ultimo tres persona a perde nan bida purbando drenta di manera ilegal na Aruba den area di Vader Piet. Esaki tabata un caso lamentabel unda e curpa di dos muhe a keda drif na lama despues cu e boto cu nan a bin a bolter. Den e caso aki tambe un persona sin identificacion a fayece.

Segun e version cu Cuerpo di Polis a manda ayera atardi den un comunicado ta indica lo siguiente: “Diamars pa mas o menos 3:30 marduga na e parti noord di Aruba, Warda Costa a intercepta un lancha. A bati alarma di biaha na central di polis na unda a despacha diferente unidad di polis. N’e sitio di e sucedido a presenta departamento di Narcotica(UGC), a ristra e lancha y a bin topa un cantidad considerabel di droga riba e lancha. A bay over na detene den total 4 hende homber.

Dos di e hende homber ta di nacionalidad Colombiano y e otro dos ta si nacionalidad Venezolano, pa finalisa nan a sigura cu nan a confisca e boto pa mas investigacion.

Mientras tanto, na october di aña pasa minister di Husticia y Asuntonan Social, Rocco Tjon a informa tocante un reunion cu nan a tene cu tur departamento Hudicial den cuadro di seguridad na frontera.

Na januari di e aña aki, minister Tjon a reuni cu e contratistanan cu ta bay entrega un oferta pa e parti construccion pa instalacion di e di cuater radar pa eleva siguridad na frontera, p’esey ta logra intercepta lancha cu ta bin direccion di Aruba.

E tempo ey, minister Tjon a sigura cu pa fin di aña pasa e di cuater radar a yega Aruba y e parti di construccion lo mester a inicia pa cuminsa cu su instalacion, di esey, minister no a duna mas detaye te awor.

Segun calculonan cu Bon Dia Aruba a logra haci recolectando informacion oficial di Kustwacht, 12 biaha aproximadamente botonan cu personanan indocumenta a drenta Aruba for di juni 2023.

Igualmente, por a recorda e caso di traficacion di persona cu a tuma luga na maart 2023 unda dos Arubiano y dos Venezolano ta deteni na KIA na e momentonan aki pa e mesun suceso aki, un caso cu a causa hopi conmocion den comunidad pa motibo di e desaparicion sospechoso di un muhe di 40 aña y pa lo cual e dos Arubiano a ser condena cu cinco aña di prizon.

No ta un secreto cu Venezolanonan ta continua den e lucha pa por tin un miho calidad di bida. Pa e motibo aki mas di 7 miyon di persona a dicidi di bandona Venezuela y bay biba na otro paisnan pa por ofrece miho condicionnan na nan famia. Den esaki, Aruba no ta un excepcion mirando cu ta un isla hopi cerca di estado Falcon, maske e yegamento cu boto y tur loke e biahe aki ta implica pa drenta di manera ilegal ta sigui keda un peliger latente, tanto pa esnan cu ta pone den riesgo nan bida, cu tambe por bira victima di mensenhandel of mensensmokkel como pa habitantenan di Aruba, cu den cierto casonan via e forma aki, armanan cu droga ta drenta.

E pregunta ta, pakico ta keda importante pa vigila frontera? hende, droga, armanan, etc. ta sigui drenta. E hecho ta tambe cu gobierno Venezolano a practicamente a militarisa peninsula di Paraguana y asina mes e trafico ta sigui. Tambe e situacion di eleccion presidencial y despues ta exigi hopi vigilancia. E beneficio di importacion di producto Venezolano ta keda minimo compara cu Corsou, di cual Bon Dia Aruba a publica un relato reciente di esey.