Mescos cu a tene den diferente districto rond di nos isla, recientemente polisnan di San Nicolas a organisa un accion hunto cu e seccion di Malesanan Contagioso y di Higiena di Departamento di Salubridad Publico. Na tur a bishita 38 supermercado, di cual a cera 13 pa falta di cumplimento.
A parti e accion den tres dia, esta dianan 19, 25 y 26 di november ultimo. Un grupo grandi di Polis hunto cu inspectornan di salubridad a bishita e establecimentonan y tur a coopera cu e control. Esunnan cu no a logra alcansa e norma spera di higiena of cu ta cumpli cu leynan vigente tabata Lago Heights Food Mart, Ollivierre Minimarket, Herbies Minimarket, Lou Cheng Food Center, Famia Minimarket, Lin Minimarket, Wintergarden Supermarket, Rey Hing Minimarket, Tio Pepe Supermarket, Sabana Basora Minimarket (Ex Julenny’s) y Cura Cabai Store.
Sin permiso
Den caso di Fruteria Colmado Dominicano, esaki ta keda cera por lo pronto pasobra e ta operando sin permiso di establecimento, sin carchi berde y pio ainda, ni tin coriente den e establecimento. E motibo principal pakico a cera e supermercadonan pa 48 ora ta cu mayoria no tabatin carchi berdad di Higiena pa nan empleadonan mientras cu algun no ta apto pa opera.
Despues di 2 dia e mesun ekipo forma pa Polis y Departamento di Salubridad Publico a presenta di nobo na e 13 establecimentonan pa confirma cu a corigi tur locual no tabata corecto y a duna nan permiso pa habri atrobe. Fruteria Colmado Dominicano si a permanece cera te ora e por cumpli cu lo minimo cu ta rekeri pa por opera un negoshi riba nos isla.
