Diasabra ultimo, autoridadnan Mexicano a pidi pa migrantenan Centro Americano cu a purba di drenta pa via di forsa na frontera cu Guatemala, pa warda cu ‘ordo y respet’, sigurando nan ‘cu tin oportunidad pa tur’ esunnan cu ta drenta den pais pa sigui e procedura regular.
Mas trempan, miembronan di e denomina caravana 2020 forma pa miles di migrante, den su mayoria Hondureño y Salvadoreño, a bringa cu efectivo di Guardia Nacional cu ta cuida e brug internacional Rodolfo Robles, un di pasonan formal di Mexico y Guatemala, pero na final nan tin cu warda.
General Vicente Hernandez, coordinador di operacion di Guardia Nacional na riu Suchiate, frontera natural entre ambos pais, a acerca te cura cu ta dividi e brug fronteriso y a dirigi na e migrantenan y a sigura nan cu lo tin un ‘recepcion humanitario’ mediante un ‘entrada controla’.
“Cu ordo y respet tur lo ta atendi. Tin oportunidadnan pa tur. Nos ta compronde e situacion, boso ta nos rumannan di Honduras, El Salvador y Guatemala” Hernandez a bisa pa e Centro Americanonan, cu a contesta atento y cu aplauso e mensahe.
Algun di nan a acepta di biaha e condicionnan di e autoridadnan y nan a cuminsa drenta den e centro di migracion, den grupo di 20 persona.
General Hernandez a informa, cu prome cu e yegada di e caravana, a reforsa siguridad den henter e frontera sur, sin duna detaye di e cantidad di agente den e frontera.
E anuncionan ta señala cu dos lo pone den marcha dos programa di empleo na ocho departamento di Honduras y na 14 departamento di El Salvador.
Human Rights Watch diamars ultimo a acusa den su informe anual cu Mexico ta viola e derechonan humano di e migrantenan cu ta transita den su teritorio.
