E tribunal di sentencia di Guatemala lo tene un huicio contra ruman y yiu di presidente Jimmy Morales, pasobra nan ta acusa di participa den varios delito di corupcion.

Diaranson un corte a duna e informacion aki durante un audiencia. A informa cu e organismo di investigacion a scoge dia 30 di augustus  pa cuminsa cu e huicio contra nan.  José Manuel Morales y Samuel Morales  ta deteni na nan cas, despues cu nan a paga un fiansa di 13 mil dollar cada un.

Awor nan mester duna cuenta di delito manera fraude y labamento di placa.

Fiscalia special contra impunidad (FECI) y comision internacional contra impunidad na Guatemala (CICIG) ta acusa famia di presidente Morales, di delito di falsificacion di factura y oferta di prijs pa compra y evento. Facturanan a ser paga caba, y nan mester a cumpli cu administracion den registro di propiedad, pero nan nunca a haci esaki, ni ofrece e servicio cu nan a priminti. E documentonan falso a beneficia supuestamente  famia di ex-pareha di Samuel Morales, yiu di presidente Morales. Pa tal motibo e ta acusa di a engaña e entidad cu ta recauda impuesto na Guatemala, pa un cantidad di 23 mil dollar.

E delito a ser cometi na 2013, prome cu Morales a keda elegi presidente, pero awor fiscalia a duna tur informacion tocante e suceso aki  y a dicidi di detene famia di presidente Morales.

E caso ta envolve 18 persona mas, cu ta supuestamente relaciona cu e acusacion aki.  E yiu di presidente Morales, tin 25 aña, y te awor no a nenga e acusacion den su contra. “Mi tabata inocente, tempo cu mi a actua” el a bisa dilanti di hues cu a mand’e pa prizon. Presidente Morales ta aleha di proceso aki, y a nenga di comenta algo tocante e caso aki.