Diadomingo autoridad federal di Merca a detene un boto den lama y panort di Cayo Largo, na costa di Florida. E boto tabatin 30 inmigrante riba dje, cu supuestamente a bin for di Cuba, medionan local a informa.
Segun pagina FlKeysNews, e grupo di inmigrante tabata transporta pa traficante di humano riba un lancha di velocidad halto di 40 pia (12 meter largo). E boto a keda deteni pa un ekipo di operacion aereo y maritimo di oficina di duana y proteccion fronteriso.
Adam Hoffner, agente di e agencia federal a bisa cu cinco integrante a purba di huy , na momento cu nan a core pa sconde den vegetacion, pero despues nan a keda gara pa polis. Na luna di januari cu a pasa, prome cu Barack Obama a finalisa su mandato, el a elimina e politica miho conoci como “pia seco, pia muha”, cu tabata vigente desde 1995 y cu a duna un trato preferencial na pueblo Cubano, pasobra tur Cubano cu a huy di nan pais y a logra pone un pia riba teritorio di Merca, por a solicita un permiso di residencia despues di 1 aña di biba na Merca.
Bao di e medida aki, e hende cu a ser descubri riba lama, mester bay Cuba bek, pero desde dos luna atras henter poblacion Cubano ta den mesun linea cu tur otro inmigrante. Awor si hende Cubano ta descubri pa purba drenta pa Merca via lama o via tera tin mesun consecuencia legal cu hende di otro nacionalidad. Na januari a stop e reporte di balseronan Cubano, cu tabata purba di yega na costa di Florida.
