Autoridad di Peru a confisca 1520 sapo cu nan tabata purba di usa pa prepara bebida afrodiasiaco na un mercado di Lima – Peru, Servicio Nacional Forestal y di Fauna Silvestre di Peru a informa (Serfor). E ‘batracio’nan (un especie di sapo) a ser comisa na momento cu tabata biaha den tres saco di polietileno, den un compartimento di un autobus na norte di Peru, Serfor a informa. E grupo di bestia aki ta bibo ainda, pero nan ta un tiki deshidrata.
“E especie aki traficante na capital di Peru tabata purba di bende, pa despues usa den preparacion di un bebida medicinal y den diferente preparacion di cuminda afrodisiaco,” Rafael Velásquez, hefe di Serfor a splica. E balor di mas di mil sapo confisca ta 3 mil dollar. E bebida den cual ta usa sapo pa su preparacion tin hopi beneficio y propiedad curativo y afrodisiaco, segun experto specialisa den practica curativo cu poder special, den diferente cultura di America Latino. Algun ta yama e bebida y cuminda prepara cu sapo e “viagra di Inca”.
Persona cu ta impulsa e consumo di sapo, ta sigura cu e ta yuda pa mehora debilidad di cerebro, cu ta combati anemia, tos, problema cu bronkio, astma, stress, nervio y impotencia sexual.
