Despues di solicitud cu ministerio publico di Venezuela a haci dilanti di tribunal, a dicidi pa tuma medida real manera congela cuenta di banco, como tambe prohibicion di benta di bienes cu ta pertenece na e empresa di Brasil Odebrecht.
E solicitud aki a ser formula pa fiscal 55 nacional y auxiliar, Pedro Lupera y Luis Sánchez dilanti di tribunal 11 di control di area metropolitano di Caracas. Representante di Ministerio Publico a dirigi un investigacion tocante iregularidad cu a sucede cu contratonan di e compania Brasileño. Ministerio publico a supervisa den pasado e revision hudicial na sede di Odebrecht, ubica na Tore Humbolt, estado Miranda.
E investigacion ey ta busca di conoce e situacion den Odebrecht y asina haya sa si e obranan riba cual Odebrecht tabata trahando ta cla of no. E obhetivo di e investigacion ta tambe pa verifica cual ta e destino di e placa, cu Odebrecht a paga pa haya nan contratonan y asina comproba si algun funcionario publico a haya un beneficio, producto di e negoshi ey.
Ministerio publico a solicita tambe un ordo pa detene un persona cu ta presuntamente relaciona cu iregularidad eynan. Autoridad a solicita tambe cu por incorpora e persona ey den codigo cora di Interpol, en caso cu e persona ta pafo di Venezuela, anto autoridad den exterior por detene y despues extradite. Ministerio publico di Venezuela a manda solicitud pa Brasil, Suiza y Merca.
