Siman pasa autoridad hudicial a confisca cocaina den waf di Rotterdam. Ta trata di 800 kilo di cocaina cu a pasa via di e haf mas druk di Europa. A intercepta un cantidad di 720 kilo den un cargamento di bacoba riba 6 di juni ultimo, mientras dos cargamento chikito mas, cu ta yega na un total di 86 kilo.

Den e cargamento di banana for di Ecuador, autoridadnan a haya un cantidad di paki di cocaina scondi. E container a yega Rotterdam riba 4 di juni ultimo, y pa 6 di juni, durante un control di rutina, a descubri e droga. Port of Rotterdam, kisas pa e aña aki lo bira un socio strategico di Curazao Ports Authority. Segun Minister di Finanzas di Corsou, Kenneth Gijsbertha, y confirma pa Prome Minister Rhuggenaath, por lo menos 35% dje accionnan den CPA lo ta na benta.

Un otro socio lo bira APC, esta Fondo di Pensioen di Corsou. Na mei e aña aki, municipio di Rotterdam a laga e Universidad mas renombra di Hulanda den comercio, Erasmus Universiteit, haci un investigacion riba siguridad di nan haf. E estudio a conclui cu, e departamentonan hudicial di e ciudad, no tin suficiente control riba siguridad den Port of Rotterdam. E estudio di Erasmus tabata auspicia pa Ministerio Publico, Duana y Cuerpo di Polis na Rotterdam.

Segun e investigadonan na Erasmus, por lo menos un kwart di cocaina importa pa Europa ta drenta via haf di Rotterdam, cual ta e futuro socio di CPA. Ta practicamente imposibel pa controla e haf. Segun e universidad, un cantidad di 7.5 miyon container ta pasa den Port of Rotterdam tur aña. Solamente 65 mil di nan ta pasa den scanner, mientras di esakinan, 4 mil so ta kibra nan seyo pa controla kico tin den nan. Ta sospecha cu tur aña, por lo menos 40 mil kilo di cocaina ta drenta via Port of Rotterdam. Ta calcula cu e balor di cocaina cu ta pasa den Port of Rotterdam ta di 2.5 bion euro.

Mayoria droga cu drenta haf di Rotterdam ta den container di fruta y berdura. Esaki pasobra e containernan aki tin urgencia riba nan y no por para largo den haf debi na fechanan di vencemento dje productonan concerni. Durante entrevista cu empleadonan dje haf na Rotterdam, a bin sali na cla cu no tin niun clase di siguridad, ken tin “badge” y autorisacion pa yega na e containernan aki. Es mas, pa un suma di cen, ken cu ta por drenta haf y habri container. Lagando di e ciudad, Ahmed Aboutaleb a duna di conoce cu e lo biaha pa paisnan di Colombia, Peru y Bolivia pa wak con por soluciona e importacion di cocaina via di Rotterdam.