Durante un anochi colorido, yena cu musica, baile, poesia, pintura y risa, Biblioteca Nacional Aruba hunto cu amigo-, amistad- y entusiastonan di arte a celebra Frida Winklaar-Domacassé. Winklaar-Domacassé ta conoci como un autor y poeta admira pa su obra literario den cual su amor y interes profundo den idioma ta resalta.
E anochi dibertido a mira un variedad di arte cu a touch riba e tema di e amor cu nos tin pa nos isla Aruba, e origen y desaroyo di Papiamento, como tambe nos historia den temponan di sclavitud y nos descendencia indigena.
Anfitriona pa gestor cultural, Mirto Laclé, e anochi literario a cuminsa cu un presentacion cortico di e bida y obranan di Frida Winklaar- Domacassé, particularmente enfocando riba su ultimo obra literario, esta “Adrinka”, cual recien a ser presenta na Hulanda. Adrinka ta explora e simbolonan cu raiznan originando for di Ghana y Costa Marfil (Ivory Coast) cu tin nan mesun nificacion y ta refleha sabiduria. Den mesun rosea tambe a pone un “spot light” riba otro obranan literario cu ta demostra e impacto y bunitesa di nos idioma Papiamento.
E encuentro tambe a disfruta di otro presentacionnan, incluyendo presentacion di arte di pintor y fotografo Steve Francees; bailenan for di e grupo Club di Movemento bao coreografia di Samantha Westera-Juppa y den cooperacion cu Vivian Maduro-Crespo y declamacionnan di poesia for di Ariana Koolman-Chirino, Aurelia Croes y e Departamento di Cultura su propio John-Freddy Montoya. Tambe tabatin canto pa Karina Maduro y musica en bibo pa e banda Ash & Friends. Mester menciona cu durante e evento, cada un artista tambe a ser honra cu un plakkaat, cu cual BNA ta demostra nan aprecio pa nan contribucion na e mundo di arte na Aruba.
E encuentro aki, aunke no a mira un audiencia enorme, asina mes tabata yena cu risa y diversion, y a pone enfasis riba e importancia di nos solamente arte y literatura, pero specialmente riba e influencia cu nos ta haya for di tur parti di Caribe y mas leu. “Tin laso (di otro cultura) cu nos ta encadena e Caribe aki den tur sentido, pero nos ta mir’e mas cultural y loke ta educacion, literatura, linguista, y creatividad,” Laclé a expresa.
