Autopsia di Khaleesi ta indica señalnan di maltrato y desnutricion di basta tempo

Mediante un post di e grupo di Facebook Street Dogz of Aruba, recientemente a bira conoci cu e cacho miho conoci como ‘Khaleesi’ a fayece debi na heridanan causa pa e cadena mara rond di su nek y tambe pa desnutricion, segun e rapport di autopsia ta indica.

E autopsia cu a wordo haci pa veterinario Contreras, tabata hopi precies y tambe lamentabel, “e principal hallazgo tabata di dos buraco, un den su luchtpijp y slokdarm di varios centimeter, ambos a wordo produci door di e morto di e tehido provoca pa e presion di e cadena riba e organonan, structuranan a inflama debi na infeccion,” e documento ta señala.

“Su pulmonnan tambe tabata inflama y cu hemoragia, debi na un neumonia causa a traves di e buraconan di e luchtpijp y slokdarm. Su musculonan tabatin falta di desaroyo, tabatin desnutricion extremo y infeccionnan, su otro organonan no tabatin un aspecto abnormal, excepto esnan cu tabata bleek.”

Esaki por wordo considera como e muestra cu e negligencia no a tuma luga pa par di dia so sino pa basta tempo.

Dia 27 di maart, a traves di un potret hopi sensitivo di Luna Foundation Aruba Inc Aruba a conoce un caso di maltrato di bestia cu a bay viral unda tabata ilustra e situacion di un mama cacho y su puppies.

A bira conoci door di su doño mes cu e cacho no tabatin mas cu dos aña y cu su nomber tabata “Blaky,” ademas te ainda autoridadnan ta bezig cu e caso aki caminda 11 di april Ministerio Publico a indica cu tabata cuestion di dos siman di tempo pa nan por tuma un decision riba Alberto Groeneveldt –doño di Khaleesi- su caso.

Mientras tanto, mas casonan di maltrato y negligencia ta continua tumando luga, caminda e tipo di actonan aki di crueldad y abuso di bestia no ta aceptabel mas.

No keda nada otro cu haci un yamada na comunidad pa no keda den silencio ora ta wak cu abuso di bestia ta tuma luga, pa otro caso manera esun di Khalessi y otro cachonan no lo sucede mas, por meld esaki na Polis di Bario y splica pa preveni e casonan aki y hasta procesa nan di un manera mas lihe, pa evita cu mas animalnan no biba den sufrimento mas.