Autobus di Aruba a mustra nan preocupacion tocante orario di ruta, mirando cu tin hende cu mester bus un orario mas laat. Tambe ta mustra descontento pa motibo cu taxi pirata ta keda un problema y no ta sigur cu ta cumpli cu regla di higiena.

Vanessa Tromp, chauffeur di autobus a bisa cu nan ta confronta situacion dificil. Nan ta bisa cu pa motibo di coronavirus hopi di chauffeur a haya miedo y no kier subi riba caminda, sinembargo tin esunnan cu tin cu traha pasobra tin persona cu mester di nan cu ta traha na hotel.

“Tin un grupo trahando, nos tin tres transporte manera bus geel, bus grandi y Arubus.” El a bisa segun a compronde cu e bus geel no lo core mas. “Arubus lo stop cu nan ruta di Noord pa 6:30pm y tin hende cu despues mester di bus pa nan yega cas”, el a menciona

Pa e motibo aki Tromp a dicidi di traha ‘e unico posibilidad cu tin’ E ta sali for di cuarto pa 6 for di su cas, sinembargo e ta haya miedo pasobra e no a geef door cu su autobus lo ta riba caminda, cu consecuencia cu lo para nan y lo haya boet.

E ta purba di sali 6:00am pa asina por busca persona na tempo pa nan por yega nan trabou trempan. Pa motibo di henter e situacion aki, Tromp ta bisa cu taxi piratea ta sigui ‘no ta stop’ dilanti nan wowo.

Segun Tromp ta un problema mirando cu nan di transporte publico tin cu usa handsanitizers, mondmask, handschoen y nan tin cu desinfecta nan bus, anto a ripara cu e taxi pirata no ta cumpli cu locual ta e pasonan di higiena.

“Bo ta ripara nan no ta usa mondmask, algo pa desinfecta y tampoco nan mesun auto. Anto esey por trece cu e persona cu ta usa e taxi pirata por contagia mas hende”, el a expresa. Despues nan ta haci uso di su autobus y e contiago por aumenta.

Tromp ta comparti cu e ta tene na regla di cuido pasobra e tin famia di 70 aña di edad na su cas, teniendo na cuenta cu sistema immuun di otro cu por ta abou y e virus por yega na su cas. E ta bisa cu esey ta keda nan problema.

Tambe ta comparti cu e reglamento di gobierno pa persona cu perde trabou caminda lo ricibi 905 florin no ta cay pa nan, sino pa taxista, pasobra e turismo ta afecta nan trabou. Sinembarg e ta bisa a afecta trabou di autobus tambe, pasobra nan ta transport di hende cu ta traha den restaurant, hotel, security. Anto e areanan ey tambe a cera.

Segun Tromp ainda ta keda transporta e tiki hende den area di hotel. Pero ora cu esey keda baha nan tambe lo perde entrada y lo keda sin salario pa fin di luna. Nan ta mustra nan preocupacion pa cu esey ‘pa awo nos tin cu sobrevivi’.

Otro chauffeur a duna di conoce cu pa nan e cambio di orario anochi ta keda fastioso pa motibo cu nan no ta yegando nan porcentahe di ganashi. Cu nan trabou di 6or di mainta te cu 7:30pm pero tin persona cu mester chauffeur despues di e ora ey.

Segun e chauffeur aki, kende a preferi di keda anonimo, e situacion ta problematico. Nan kier pa persona wak pa su mes y duna rapport pa minister, mirando e situacion cu nan ta pasando aden. Tur esunnan cu ta cay bou di departamento di transporte ta confronta e mesun situacion ‘ken ta bay resolve?’

Awo cu situacion di virus tur e transporte publico a perde nan entrada. “Nos no por core bashi, pero tin hende cu ta stop di traha 7or di anochi cu nos por transporta nan; pero tin algun cu ta sali mas laat y no por duna servicio pa motibo di toque de queda.”

Segun e chauffeur ta bisa cu a pesar cu niun auto mag di ta riba caya despues di 9or di anochi ta haci cu ora cu polis bay controla ta wak un autobus mas facilmente cu ora nan wak un auto di e taxi pirata.

Esey ta ocasiona cu nan lo por haya boet y mirando cu nan entrada no ta bayendo bon ta pone nan den un situacion fastioso. Nan ta bay manda un carta pa polis pa mustra nan punto di bista. Nan lo splica DTP pa e situacion y busca un solucion, pa duna nan un oportunidad di mas flexibel pa nan por yega un tiki mas laat.

Segun e chauffeur ta duna di conoce cu tin algun cu ta tuma e risico di toch transporta un persona pasa di ora. Esey a pone cu e chauffeur cu a haya su mes den problema. Nan ta pidi pa Departamento di Transporte Publico y minister di transporte haci cu nan algo pa nan situacion.