(Energia16.com) – Parlamento di Costa Rica a duna luz berde pa doño di auto electrico no paga impuesto mas. E presupuesta cu tabata den preparacion pa varios luna a wordo aproba cu 37 voto na fabor y uno contra.
E nomber di e ley ta ley di incentivo y promocion pa transporte electrico. E ley nobo lo haci e compra di vehiculo electrico mas accesibel. E proposito ta cu esaki lo contribui na disminui e dependencia riba combustibel fossiel den transporte.
Ta spera cu si Costa Rica aumenta benta di auto electrico, e por bira un pais neutral den emision di carbon na 2022.
Sin embargo, no ta tur impuesto ta keda exonera. E ley ta concerni tres en concreto: e impuesto general riba benta, esun selectivo di consumo y e impuesto riba balor duanero. Adicionalmente lo tin un tipo di exoneracion di e balor CIF (costo, seguro, y flete) di e vehiculo.
Tempo cu a cuminsa cu e proyecto a contempla e importacion di unidad di menos cu cinco aña di edad di fabricacion. Tambe a haci cambio den e structura den sentido cu lo considera solamente vehiculo electrico, cero emision. Na inicio, tabata contempla ainda tuma na cuenta auto hibrido.
Ademas tambe ta exonera pieza pa auto y e uzo di e centronan di carga bateria. E autonan electrico lo no ta suheto tampoco na e restriccion di uzo riba cierto dia segun number di auto cu ta na vigor pa motibo di reduci efecto di contaminacion. Tampoco nan lo paga pa staciona y lo tin espacio special di stacionamento na diferente sitio, manera na e centronan comercial. Prome cu e ley a haya luz berde, ya a instala caba shete stacion pa recarga auto. Desde algun tempo e pais ta produci practicamente 100% di e energia cu e ta consumi, di fuentenan limpi.
Pa e motibo aki autoridadnan ta busca pa probecha di e potencial aki pa fomenta e cambio di tecnologia den transporte.
