Bon Dia Aruba a tuma contacto cu Thaisse Erasmus kende ta miembro y office manager na Fundacion Autismo Aruba(FAA), pa asina haya sa kico nan ta haci pa yuda ya cu nan no ta cay bou di gobierno y pashentnan no ta wordo cubri pa AZV.

Sra. Erasmus ta bisa cu hopi hende tin e fundacion confundi manera un instancia cu ta duna trato na muchanan autista pero esaki no ta asina. E ta bisa cu hopi biaha ta haya mayornan cu ta trece e muchanan cerca nan pensando cu lo haya algun tratamento. Locual cu FAA ta haci ta duna informacion y guia e mayornan den e situacion y e caminda cu nan mester cana.

Desde cu un mayor ripara cu un mucha por tin señal di autismo, FAA ta zorg pa nan tin tur e informacion cu nan mester y asina por bay na e persona corecto pa haya un diagnostico y terapia. Tambe por cu e tabata un señal falso pero semper ta bon pa ta sigur. Cu añanan di experencia, FAA por semper señala pero no tin e derecho di duna un diagnostico.

E enfoke ta e consentimento pero locual cu ta desvia di esaki ta cu nan mester recauda fondo. Esaki no ta solamente pa actividadnan cu nan ta organisa pa muchanan y mayornan. Nan mester di e fondonan paso cu nan no ta cay abou di gobierno nan no ta wordo cubri den nada. Asina ta cu fondonan ta cubri salarionan tambe pa asina e fundacion por sigui den funcion.

Otro rason ta cu semper nan ta purba di yuda mayornan cu no por cubri e terapianan pa Autismo. E aña aki manera tur aña den luna di april a organisa actividadnan y a trece lectornan di afo. E aña aki nan a zorg pa concentra den workshops pa docentenan, con pa deal y yuda nan alumnonan.

Sra. Erasmus ta bisa cu nan no ta registra locual ta numbernan di diagnostico aki na Aruba pa cu Autismo. Un manera cu nan ta haya e informacion ta na momento cu un mayor bay na un profesional via e fundacion y nan ta yama bek lagando nan sa acerca di e situacion pero no tur ora esaki ta pasa.

Trato na Aruba

Pa locual ta trato, sra. Erasmus ta bisa cu e unico psikiatra di mucha awor ta bayendo for di Aruba y ainda no tin bista ariba ken lo keda na su luga. E ta bisa cu den su opinion e trato na Aruba pa Autismo no ta suficiente y falta hopi ainda pa desaroya. E tin 10 aña trahando cu e fundacion y locual cu si a cambia ta cu ya e no ta un tema taboo mas. Awor menos mayor tin berguensa di yama y busca ayudo compara cu prome.

Na scol tin algun docentenan tambe ta busca ayudo na FAA. Esaki ta algo cu e ta contento cu ne. Locual si ta cu muchanan ta wordo husga mucho lihe na scol y pa cualkier cos chikito na ta wordo bisa cu e mucha mester wordo manda pa un profesional. Mescos a pasa cu ADHD, awor ta asina cu Autismo. Sra. Erasmus ta bisa cu e nazorg despues di e diagnostico ta locual falta hopi na Aruba. Ora cu e pashent haya un diagnostico, no tin un guia.

Locual tin ta overbelast y e ta priva pasobra cu e no ta cay abou di AZV. Tur pashent ta diferente asina ta cu tur ta haya un otro trato, sea ta guia den e habla, parti social por ehempel y esaki simplemente no tin. Segun sra. Erasmus tin hopi mayor pega cu esaki y no ta haci nada. Algun mayor ta purba si di haci nan best hincando e muchanan den cierto actividadnan pero bayendo bek na e diagnostico, algun mucha simplemente no por cu esaki y mester di e guia apropia. Sra. Erasmus ta bisa cu den e parti di educacion, cada biaha mas y mas scol ta habriendo nan mes pa siña mas ariba e tema asina pa nan yuda nan alumnonan ya cu tin muchanan cu ta hasta keda sin bay scol.

Ayudo di gobierno

Sra. Erasmus ta bisa cu den su 10 añanan cu e fundacion e la mira hopi politico cu ta para sea ta pa potret pero, no a yuda nan den locual cu nan mester ni si nan a bisa cu nan lo yuda. Locual cu mas nan mester ta e fondonan asina pa por organisa eventonan y conscientisa Aruba mas y sigur yuda esunnan cu no tin e budget suficiente pa terapianan. E ta bisa si cu minister Michelle Hooyboer a tuma parti di y a yuda den nan workshop. E ta bisa cu e ta curioso y kier mira kico lo pasa den e eleccion venidero.