Prome ministro Scott Morrison di Australia a sinti su mes obliga pa corta su trip pa Hawaii, mientras critica tabata aumentando na su pais pa su vacacion meymey di e candelanan cu ta destruyendo bon parti di su pais. Diasabra pasa un persona a fayece y candela ta continuando den tres estado. Desde september candela a costa bida di 9 persona, a destrui mas di 700 vivienda y a kima miyones di hectar.
Morrison a declara ayera: “Mi ta comprende cu hende ta disgusta pa haya sa cu mi tabata di vacacion cu mi famia mientras nan famia tabata bao di stress grandi.” Papiando despues di un briefing cu funcionarionan di cuerpo di bombero, el a bisa cu e sa cu Australianonan ta preocupa cu e candelanan pero a insisti cu e respuesta di emergencia tabata “e miho di mundo”.
El a admiti cu cambio di clima tabata contribui na cambio di patron di tempo, pero a nenga cu esaki a causa directamente e candelanan di mondi na Australia. “No ta un sugerencia creibel pa pone e relacion ey,” el a argumenta.
Hopi Australiano a acusa gobierno di Morrison di falta di accion contra calentamento global, cu critica creciendo mientras un ola di calor a kibra record den henter e pais y a haci e candelanan mas grave ainda.
Aunke cambio di clima no ta e causa directo di e candelanan di mondi, cientificonan a adverti cu un clima mas cayente y seco lo por contribui na haci candela mas frecuente y intenso.
Lider di sindicato di bombero Leighton Drury a bisa cu Australia tabata “mirando un falta total di liderazgo di gobierno, y esaki ta un berguensa.”
