Director di DIP ta hiba maneho di ignora carta y stroba desaroyo

Director di DIP ta strobando un proyecto educativo di gran balor, pero Kanaan Baroud lo no duna su mes por vencido. Su compania AUSOMA International Education Center VBA lo bay Corte pa haya extension riba su opcion pa desaroya scolnan Beatrix y Juliana den un centro educativo internacional.

AUSOMA a ricibi opcion riba edificionan di scolnan Juliana y Beatrix na Juli 7, 2021. A haya 6 luna pa cumpli cu e rekisitonan pa cumpli despues di a paga 3900 florin pa e opcion. Den e temporada ey, e entidad cu ta opera American University School of Medicine a haci tur locual tabata conoci p’e pa cumpli.

Pero segun Kanaan Baroud di AUSOMA, for di prome dia caba DIP a haci dificil pa por cumpli. “E opcion cu a duna no tabata completo. Tabata falta informacion y mi tabata manda pidi esakinan na varios ocasion. M’a manda diferente e-mail y corespondencia pa Dr. Haime Croes, Director di DIP y tambe di despacho di Prome Minister,” Baroud a splica. E cartanan tabata pa informa cu pa e por cumpli cu tur e rekisitonan di un opcion, e falta informacion. Y un di nan tabata un di e mas principal, bou cua condicion of areglo financiero, AUSOMA lo haya e dos edificionan.

“Durante Gabinete Evelyn Wever Croes I, e tempo ey Minister di Enseñansa dr. Rudy Lampe a bin cu e idea aki di un centro educativo cual nos a aplaudi. Minister a hiba esaki (e plan) pa Parlamento cu a aproba y a duna DIP e autorisacion pa cuminza cu e opcion. Basa riba decision den Parlamento, AUSOMA a cuminza cu su plannan y mapanan, teniendo na cuenta cu por ehempel edificio di Beatrix ta un monumento. Xavier Real Estate tabata e compania cu a prepara tur e documentonan y logistica pa AUSOMA International Education Center y a entrega esakinan na DOW. E prome mapanan a keda entrega na November 2021. “E opcion lo a caduca dia 7 di Januari 2022 pero nos a entrega nos documentonan mucho prome cu esey, incluso na Sr. Shak Sjie cu e tempo ey ainda tabata traha cu DIP.”

DIP no ta contesta

Segun Kanaan Baroud, na momento cu Parlamento a duna luz berde pa e proyecto, tabata pa DIP determina a base di kico AUSOMA International Education Center lo a haya e edificionan. Den otro palabra, si e ta bira un contract di lease, un contrato di huur of opcion pa cumpra e edificionan for di Gobierno. “Den e prome instancia, nos a bisa cu si ta pa lease, e mester ta uno pa un periodo largo pasobra e inversion ta hopi. En principio, esey pues no tabata por. Pasobra ma compronde cu pa lease, Gobierno por duna solamente cinco aña. Pues pa nos inverti 10 miyon florin pa haya cinco aña, anto e no ta vale la pena.”

Baroud a splica cu tabata e propio Director di DIP, dr. Croes kende a bisa cu tin dos alternativa. Esta cu por determina un prijs pa e dos edificionan cu AUSOMA International Education Center lo mester paga of ta dividi e balor cu e dos edificionan aki tin den e canon di 60 aña cu normalmente ta haya pa un erfpacht, y e ta bin adicional riba e canon di erfpacht. “ Esey ta e contesta cu mi ta warda di haya tur e lunanan aki.”

Baroud a sigui conta cu apesar cu a discuti e proceso aki, ningun momento DIP a haci e calculacionnan di e balor pero si tabata pidi un ‘Businessplan’ pa e centro educativo. Sin e prijs y areglo tabata haci dificil pa banconan por haya un idea cuanto mester pa financia. “Asina mes nos a traha nos plan, basa riba calculacionnan pasobra mi mes no sa e suma ainda (di e balor di e edificionan). Despues di tur esaki, inversion den tempo y placa, entre otro pa e trabou di arkitectura, mi ta ripara cu e fecha di (e vencemento di) e opcion ta yega y mi ta manda dr. Croes un corespondencia atrobe pa pidi contesta riba e peticion di extension. Den e carta mi a bisa cu si mi no tende nada, mi ta asumi cu e ta un ‘si.’”

Pues Baroud a continua riba e proyecto y pa su sorpresa, na ten a Maart ta haya un carta di Director di DIP, dr. Haime Croes cu e opcion a caduca ya cu no a cumpli cu tur condicion. “Ami kier sa kico esaki ta. Nos ta un instituto hopi serio. Mi ta mas di 20 aña den e tipo di educacion aki. Nos a trece Xavier School of Medicine y awor nos ta cu American University School of Medicine desde 2018.”

DIP ta stroba desaroyo

E Universidad nobo ya caba tin ma di 100 studiante na Aruba, y AUSOMA ademas a caba di sera un acuerdo cu Hudson Valley Community College, un otro instituto educativo Mericano, dirigi na studiantenan di Aruba. “E idea di e edificionan ta pa nan bira un centro educativo, unda tin facilidad di estudio medico, facilidad di ‘high-school’, programa di certificacion. Den otro palabra, haci uso di e edificionan aki pa locual a traha nan, esta pa educacion. Nos kier mantene locual e ta.” Baroud a splica cu e colaboracion cu Hudson Valley ta particularmente pa yuda graduadonan di e programa di GED ( General Education Development) cu Gobierno ta subsidia pa International School of Aruba ofrece Arubianonan pa toch logra haya un diploma na nivel scol secundario. Sinembargo, ningun instituto na Aruba ta reconoce e diploma GED. “Nos kier brinda e studiante Arubiano aki e oportunidad pa sigui studia na Aruba bou di un Universidad acredita, cu un diploma Mericano. Directiva di AUSOMA ta kere den e proyecto y tin su financiamento caba.”

Pero, tur e plannan aki ta pendiente e opcion di DIP, y como tal, ta considera pa bay Corte. “Ya nos abogado a manda un carta y ni riba esey nos ta haya contesta di dr. Croes. Nunca cu mi a manda un carta pa sr. Haime Croes e ta contesta. Di nos parti nos a cumpli, nos intencion ta bon, nos no kier haci nada pa bay contra Pais Aruba. Al contrario, nos kier yuda comunidad y studiantenan. E cos aki ta bon pa Aruba y mi no ta compronde con un departamento ta stroba henter un desaroyo.”

Segun Kanaan Baroud ta respeta e liñanan di autoridad, y como tal, semper a purba negocia cu e departamento encarga cu ta DIP, sin cu mester bay na Minister encarga cu ta e Minister di Infrastructura, den e caso aki, Prome Minister Evelyn Wever Croes. “E departamento tin su director y Minister ta respeta esey. Nos tambe ta respeta esey. Pero si e departamento no ta funcciona manera mester ta, mi ta supone cu Minister mester envolvi su mes si ta haci daño na pais. Mi ta sigur cu Prome Minister lo yega na e punto ey, sea ta pa ami of pa otro.”

Locual Kanaan Baroud ta kere cu DIP mester sirbi tur ciudadano. Si haci un peticion pa desaroyo, e ta positivo pa henter e pais. Pasobra ta stimula economia. “Mi sa cu tin diferente problema cu a sosode, pero tin cu cana paralelo cu desaroyo. Si mi a haci peticion pa un tereno y DIP ta bisa cu e tereno no ta bon pa e negoshi, anto bisa cua ta e otro alternativa anto. Mustra kico por y no stroba persona cu kier desaroya, sin duna oportunidad pa entrega ‘bezwaar.’”