Awe den oranan di atardi, prome minister demisionario Evelyn Wever-Croes a duna un conferencia di prensa pa informa comunidad tocante medidanan di Covid-19 na unda cu el a trece dilanti cu e situacion na hospital ta critico pero e ta controla.
Ta p’esey cu Crisis Team a dicidi di flexibilisa algun medidanan entrante mañan diahuebs 2 di september, ademas rumornan a cuminsa core awe atardi cu scolnan di Skoa no lo habri mañan pa motibo cu docentenan lo haci un protesta pa trahadonan di limpiesa.
Anuesca Baly director di Skoa a confirma pa Bon Dia Aruba cu efectivamente mañan scolnan di Skoa no lo cuminsa aña su escolar nobo pero e no a duna mas detaye.
A pesar di e decision aki di Skoa, Wever Croes a menciona den conferencia di prensa cu otro scolnan cu no ta cay bou di Skoa si ta cuminsa mañan manera el a anuncia algun siman atras y pa loke ta Skoa mes, el a bisa cu esey “Skoa lo tin cu atende cu mayornan” y cu su persona a indica pa minister demisionario di Enseñansa Armando Rudy Lampe pa atende e problema aki cu Skoa “manera adultonan pa nos no perhudica nos muchanan y nos hobennan”.
Di otro banda, Sharline Koolman di DVG a expresa cu entre ayera y awe a tuma luga diferente reunion pa asina hunto nan por yega na un consenso mirando e casonan cu tin ainda pa Covid-19, diferente cifranan tin tendencia di baha na unda cu mester tene na cuenta cu esey no a baha ainda caminda cu nan kier pa esey ta, “pero si e ta mustra cu e ta bayendo den bon direccion “.
Tocante e flexibilisacion di medidanan, Koolman a anuncia cu toque de queda lo wordo elimina for di mañan diahuebs.
Tambe el a comenta cu pa deporte y training lo por haci’e cu publico y por atende esaki cu un maximo di 90 persona.
Pa entretenimento, el a trece dilanti cu 5 persona por performance den e parti di musica pero no mag di tin bailamento ainda.
125 persona por atende un entiero pero mester tene na cuenta e grandura di e luga.
Tapaboca su uso ta keda obligatorio ora e personanan ta paden di un localidad.
