“Nos ta purba splica e personanan cu nos haya di Reclassering ken nos ta como fundacion y tambe laga nan sinti cu nan por haci un diferencia aunke e ta un trabou comunitario obligatorio. Pa nos e ta importante cu nan t’ey, pasobra nan ta yudando nos.”

Diahuebs ultimo Stichting Reclassering en Jeugdbescherming Aruba a tene un charla na Biblioteca Nacional conhuntamente cu e instancianan cu ta colabora cu e fundacion ora di laga personanan cu a comete un echo castigabel haci trabou comunitario na organisacionnan manera Centro di Bario of Stichting Ambiente Feliz.

Reclassering a aclaria cu nan no ta yuda solamente hobennan y muchanan cu lo a haya nan mes den contacto cu husticia, si no tambe adultonan cu ta comete un infraccion cu hopi biaha no ta serio pero cu si ta castigabel pa codigo penal. Tambe por trata personanan cu a comete un eror den nan bida, den cual Reclassering ta yuda pa nan haya un bon caminda bek.

Husgamento pa a bin di Reclassering
E personanan aki hopi biaha ta experiencia husgamento biniendo di otro personanan ora nan bay haci nan trabou comunitario ‘pasobra esey ta di Reclassering’, cual ta crea un stereotipo negativo di nan.

Durante e charla a enfoca pues con por ta mas envolvi cu personanan cu mester haci trabou comunitario pa asina deshaci di nan castigo. Marina Jones, coordinadora di seccion Sancionnan Alternativo na e fundacion a expresa durante su discurso na e partnernan di Reclassering cu ‘otro hende no ta mira e personanan aki den bon luz, pero nan tambe ta hende’.

Pero mas leu di e percepcion eroneo cu si un persona bin di Reclassering esaki ta nifica cu ta un mal persona, durante e charla sra. Jones a splica e beneficio pa fundacionnan cu ta colabora cu Reclassering. Hopi biaha e ayudo extra, aunke obligatorio, ta crea un alivio pa e fundacion cual practicamente pa un tempo limita ta haya un boluntario extra.

Pues sra. Jones a sigui splica na publico cu en bes di pensa malo di personanan cu ta ricibiendo guia of un tarea di Reclassering, esaki por ta un gran oportunidad no solamente pa e fundacion cu ta haya un man extra, si no tambe pa e persona. Esaki mirando cu e personanan por haya un oportunidad pa haci algo cu normalmente nan no ta haci, siñando asina algo nobo, of tambe luci cu nan talentonan cu nan tin caba.

Motivacion
E positivismo aki mester ta loke ta e enfoke entre e instancianan y Reclassering, pues sra. Jones a comparti cu tokenan simpel por yega hopi leu pa un persona sinti su mes mas na cas. “Bo no mester haci un cita y sinta cu koffie, simplemente tik riba nan schouder prome cu nan bay y puntra nan con nan dia a bay por bay masha leu.”

Motibonan cu un persona por ta demotiva pa haci sinta haci nan tarea comunitario como parti di nan castigo ta encera cu posiblemente e persona no ta haya ningun push positivo. “Nos tur ta hende, pues si bo bisa un persona aki aya cu nan a haci un bon trabou awe, nan tambe por cuminsa mira nan experiencia como uno positivo y no negativo.”

Aunke tin personanan cu no ta haya nan experiencia positivo, posiblemente entre otro segun sra. Jones pasobra nan no ta di acuerdo cu e infraccion mes cu nan a comete, tin organisacionnan cu despues cu nan a tuma hende den cuadro di un proyecto pa servicio comunitario, ta crea lasonan cu personanan haciendo cu nan ta sigui como boluntario despues.

Reclassering y fundacionnan ta activa hende pa bira boluntario
Un ehempel ehemplar di esaki ta e proyecto di intercambio cu ya tin añanan ta andando entre Centro di Bario Brazil y Reclassering, cual segun Chico Harms, vice presidente di e organisacion a conta Bon Dia ta conduci na un gran cantidad di ‘hende cu ta keda cerca nos te despues cu nan a completa nan tarea’.

”E hendenan aki a yuda nos hopi pa loke ta trata mantencion di Centro di Bario, pero mi lo bisa mas leu ainda cu Aruba completo tin mester di e hendenan aki y nos tin cu bay yuda nan tambe. Nan ta bin cerca nos, haci nan trabou, bay y djey nan ta keda bin cerca nos como amigo.”

E relacion bilateral aki Stichting Ambiente Feliz tambe ta crea cu e personanan cu nan ta haya por medio di Reclassering. Lukee Croes, director di e fundacion ta splica. Nan ta purba papia cu e personanan y splica nan kico ta encera e trabou cu e fundacion ta haci.

“Tin biaha tin menos motivacion pasobra porta e persona mester chapi pero e no sa chapi, pero asina bo ta ripara cu di nos banda nos tin cu inverti mas den e personanan aki. Mi kier invita tur esnan cu tin diferente proyecto pa considera tuma un persona cu aunke ta un hende cu a comete un delito pa duna e persona un oportunidad no solamente pa yuda si no pa nan siña hopi tambe. E ta un win-win pa e luga unda e proyecto ta tuma luga y e persona mes.”