Manera ta conoci, durante tratamento di presupuesto nacional di pais Aruba pa 2025, fraccion AVP y Futuro a entrega un amienda cu a cambia e direccion completo di e presupuesto. Door di esaki, presidente di parlamento, Gerlien Croes a tuma decision pa manda e amienda pa e organonan consultivo pa pidi conseho prome cu continua cu e tratamento di presupuesto. Dia 19 di maart ultimo CAft a manda su conseho pa presidente di parlamento.
Dia 17 di juni 2024 Colegio di Supervision Financiero di Aruba (CAft) a duna su conseho riba e concepto di presupuesto 2025 (OB) di Pais Aruba. Manera ta conoci e dia 11 di februari a entrega e prome nota di cambio pa cu esaki, sigui pa un di dos nota di cambio dia 6 di maart 2025. Diabierna 7 di maart fraccionnan di Partido AVP y Futuro a entrega nan amienda.
Den su conseho CAft ta splica cu despues di aplica tanto memorandum di splicacion como e amienda, Aruba ta presupuesta un surplus di AFL. 176 miyon pa e sector colectivo den aña 2025, cu ta 2.2% di e producto interno bruto (GDP). Ademas, un surplus anual tambe lo ser presenta den e periodo 2026-2029.
Esaki ta nifica cu Aruba ta cumpli cu e norma presupuestario di e saldo di financiamento di e sector colectivo di por lo menos 1% di GDP di acuerdo cu e ley di LAft y cu e compensacion di deficit prescribi.
Na mesun momento, CAft ta constata cu e medidanan di maneho proponi ta reduci e alcance presupuestario pa absorbe contratiemponan. Esaki ta reduci e habilidad pa absorbe shocknan externo.
Pa loke ta e surplus di financiamento, CAft ta splica cu e surplus di e pais ta alcansa 0.8% di GDP, mientras cu e surplus di otro entidadnan di sector publico ta alcansa 1.4% di GDP. CAft ta señala cu esaki lo no genera suficiente surplus pa e pais na 2025 por aloca por lo menos 1% di GDP pa pago di debe.
Incluyendo e surplusnan di e otro entidadnan, esaki ta garantisa, basta cu e surplusnan aki ta flui pa e pais pa pago di debe. CAft ta remarca cu LAft ta stipula cu henter e surplus presupuesta di e sector colectivo ta ser usa pa reduccion di debe.
P’esey CAft ta recomenda pa mas pronto posibel yega na acuerdonan cu Algemene Ziektekosten Verzekering (AZV) y Banco di Seguro Social (AZV) pa asina e surplusnan di e entidadnan aki por ser usa tambe pa reduccion di debe. Esaki ta den cumplimento cu e obligacion legal pa mantene un reserva.
CAft ta enfatisa cu si Aruba por usa henter e surplus di e sector colectivo pa reduccion di debe, e pais lo mester fia menos placa y e presion presupuestario di cobransanan di interes, cu ta na 16% di e presupuesto, por ser reduci.
Pa loke ta ta trata proporcion di debe, e organo di supervision ta indica cu e debe di e pais na fin di 2025 ta suma AFL. 5.201 miyon, of 65% di GDP. Di acuerdo cu e principionan tocante crecemento economico y pago anual di debe nominal, e cuota di debe lo baha te na 51% na 2029. E presupuesto, despues di ambos nota di cambio y e amienda, ta mustra un desaroyo positivo di e cuota di debe.
Sinembargo. CAft ta señala, e desaroyo aki ta regarda solamente e debe di e pais y no esun di henter e sector colectivo. Ademas, e organo ta agrega, ainda no ta cla kico e composicion precies di e sector colectivo lo ta na 2025, como cu esaki no a ser determina ainda. P’esey CAft no por evalua con e posicion di debe di e sector colectivo lo desaroya riba termino mas largo.
Tocante e medidanan di politica, CAft ta constata cu e maneho nobo – manera inclui den e presupuesto, e prome y di dos nota di cambio y e amienda – lo reduci e saldo di financiamento di e pais cu AFL. 240 miyon compara cu 2024. CAft ta remarca cu aunke esaki ta keda den e cuadro di LAft, e ta nifica tambe cu Aruba ta nabegando mas cerca di biento. Esaki ta limita e espacio pa por absorbe contratiempo, specialmente den caso di shocknan economico.
Mirando e desaroyonan geopolitico actual y e incertidumbre rond di crecemento economico (global), CAft ta conseha pa sigui mantene cautela den politica presupuestario.
E intensificacionnan, manera e aumento di e reparatietoeslag pa pensionadonan, ta ser cubri parcialmente pa reduccionnan structural den e articulonan di bienes y servicio y gastonan di personal. CAft ta enfatisa cu ta positivo cu (parcialmente) cobertura structural tambe ta ser busca pa intensificacion structural.
CAft ta recorda cu anteriormente a conseha pa reconsidera criticamente e punto di bienes y servicio, mirando e sub-explotacion. Mirando e aumento substancial di e repartietoeslag, CAft ta recomenda pa ora di otorga e toeslag aki haci un test di entrada, manera ta inclui den e Ordenansa Nacional riba Reparatietoeslag. Esaki ta contribui na limita e impacto presupuestario di e medida.
Pa loke ta trata inversionnan CAft ta constata cu e presupuesto di inversion pa 2025 lo subi cu AFL. 30 miyon. Con esaki lo ser implementa ainda no ta cla. E organo ta propone pa establece un fondo di inversion, alimenta pa e gastonan di capital di e pais.
Mientras cu ta positivo cu inversionnan ta aumentando, CAft ta constata cu den ausencia di un agenda di inversion di varios aña, tin riesgo cu e espacio presupuestario aki na final lo no ser encaha y usa pa gasto di consumidor. Nan ta splica como ehempel, e presupuesto a inclui un aumento gradual di inversionnan te na mas o menos AFL. 140 miyon na 2029. CAft ta constata cu e nivel anual di inversion na 2029 awor ta alcansa AFL. 60 miyon. Den e cuadro aki ta CAft ta recomenda pa entrega un programa di inversion di varios aña bon funda na Estadonan di Aruba.
Pro ultimo, den liña cu e conseho riba e presupuesto, CAft ta pidi pa reduci e exigencia di financiamento pa 2025 door di usa e surplus di henter e sector colectivo. Pa esaki ta importante pa haci acuerdonan mas pronto posibel cu AZV y SVb riba con e surplusnan di e entidadnan aki por ser usa pa e pais pa reduccion di debe, teniendo na cuenta e obligacionnan financiero di AZV y SVb den futuro.
E organo ta pidi tambe pa presenta e desaroyo multianual di e debe di henter e sector colectivo den e prome presupuesto complementario pa 2025.
Ademas ta pidi tambe pa den e prome presupuesto complementario pa 2025, presente e desaroyo multianual di gastonan di personal di acuerdo cu e definicion di LAft.
Y por ultimo ta pidi pa yega urgentemente na un agenda di inversion di varios aña cu ta alinea cu e capacidad di implementacion di e pais. Control di belasting ta keda mesun importante cu nunca pa sigura cu e espacio presupuestario ta ser realmente usa pa inversionnan riba termino mediano.
