Segun Minister Presidente, Evelyn Wever-Croes nos situacion financiero di pais Aruba ta ‘hopi dificil y hopi critico.’ Pues den e situacion critico aki, gobierno ta preocupa pa tur desaroyo. “Arubalening ta un di nan,” segun e mandatario.
Sinembargo e prome mandatario a laga sa cu ainda nan no tin un decision si nan no bay duna Arubalening. El a splica cu gobierno ta tumando nan decisionnan paso pa paso, manera e situacion ta bay desaroyando.
E sa cu pa varios di nos hobennan cu ta terminando nan estudio akinan na Aruba, tin e posibilidad grandi di sigui nan estudio den exterior. Den e caso aki gobierno no kier yega na e punto di nenga e Arubalening.
Minister Presidente a afirma cu gobierno ta haciendo tur lo posibel pa nan por cumpli cu nos hobennan pa sigui nan estudio den exterior. Sinembargo e ta kere cu ainda ta un tiki tempran pa un decision. Ademas henter mundo ta den un crisis ainda, y te ainda no tin vuelo pa bay den exterior. “Pues esaki no ta e momento pa nos papia si tin fiansa pa bay den exterior,” el a declara.
Un motibo cu tin gobierno preocupa tin di haci cu gobierno su entradanan a cay. Nan no tin suficiente entrada mes pa cubri nan gastonan di tur luna. El a indica cu entrada di gobierno a baha cu 80% dor di e crisis di coronavirus.
El a splica cu awor cu nan por a logra e rebaho den gasto di personal cu ta uno substancial, ta duna gobierno mas espacio. Pero ainda mes e no ta suficiente pa cubri tur e gastonan cu gobierno tin. Di otro banda ainda nos no sa ki tempo nos industria turistico y nos economia por yega na e nivel cu e tabata antes.
