Minister Rudy Lampe a declara na Bon Dia Aruba cu niun momento el a firma e landsbesluit of decreto nacional cu a conduci na e retiro di Sra. Marisol Lopez-Tromp for di gabinete Wever-Croes.

“Mi persona ta e unico minister cu no a duna su accordering na e decision ey di ministerraad,” el a declara.

E mandatario kier a aclaria e asunto aki, ya cu e por mira den prensa como si den reunion di conseho di minister, el a bay di acuerdo di e decreto nacional aki cu a conta cu aprobacion di minister presidente, Evelyn Wever-Croes. E decreto aki a wordo manda pa gabinete di Gobernador dia 22 di october ultimo pa asina concretisa e retiro di Lopez-Tromp. E carta cu Gobernador di Aruba a dirigi e mesun dia pa presidente di Staten a bisa textualmente cu: “Conseho di minister a aproba e retiro dia 21 di october 2020.”

E mandatario a coregi e redactor di Bon Dia Aruba, Benjamin Romero kende a puntr’e si su persona a aproba e landsbesluit cu a pidi retiro di Lopez-Tromp for di gabinete di coalicion (MEP-POR-RED). E ta lamenta cu den prensa ta sigui ripiti un informacion cu e mandatario a cualifica di ‘incorecto.’

No a bay di acuerdo

Minister Lampe a indica cu ta estableci den e acta relaciona cu e decision aki cu e tabata e unico minister cu no a bay di acuerdo pa retira Sra. Lopez-Tromp for di gabinete actual. Te hasta e mesun minister presidente a bisa esey tambe.

P’esey e decision di conseho di minister a bay Gobernador ‘niet unaniem,’segun e mandatario di enseñansa. El a bisa cu tin un ministerraad besluit unda Prome Minister a pidi conseho di minister pa bay di acuerdo pa start e procedura pa retira Sra. Lopez-Tromp. Pero el a bisa categoricamente: “E unico minister cu no a vota na fabor ta minister Lampe.”

Igualmente el a bisa cu Minister President a comunica na Sr. Gobernador cu e decision no tabata unanime na conseho di minister. Minister Lampe a declara cu partido RED ta consecuente den esey, ya cu e lider di fraccion di RED no a vota na fabor di e mocion di desconfiansa contra Lopez-Tromp. Mas bien parlamentario Ricardo Croes a abstene di vota.

El a splica cu su persona como minister apunta pa partido RED, “tambe a abstene di vota na fabor di e procedura di retiro di minister Marisol Lopez-Tromp.” El a argumenta cu nan no tin problema cu minister Marisol. Tampoco nan no tin problema como parti di e gobierno di coalicion di traha cu e minister cu a keda retira siman pasa.

Decision

Lampe a bisa cu e di dos paso cu a surgi tabata cu unabes cu a inicia e procedura di retiro di minister Lopez-Tromp. E ora ey lider di fraccion di RED y su persona tabata consecuente den nan posicion. Ya cu ora Gobernador a ricibi e decreto di retiro aki a dirigi un carta na Presidente di Parlamento pa tende for di nos organo legislativo tocante e intencion pa retira e minister. Eynan den e comision central, lider di fraccion di RED si a bisa cu nan ta parti di un coalicion, caminda e mayoria a bisa cu nan no por traha cu Sra. Lopez-Tromp. “Un minoria so cu ta nos a bisa cu ta Ok,” el a bisa

Pero e ta reconoce cu den democracia e mayoria ta manda. Pues e ta haya cu den coalicion e mayoria ta bisa cu no por traha cu e ex minister, pues den e caso aki, lider di fraccion di RED a expresa den e comision central cu ta sostene e decision di e mayoria.

Di su banda su persona como minister apunta pa partido RED, el a firma cu a bay di acuerdo pa minister president tuma temporalmente over e cartera di infrastructura. Ademas unabes cu mayoria di minister a bisa cu nan no por traha cu Sra. Lopez-Tromp, minister Lampe a laga sa cu e tambe ta respeta e decision di e mayoria. Pero el a bay di acuerdo pa Minister President tuma over e cartera aki.

Honor na bo mes

Analisando henter e situacion cu a desemboca cu e salida di Sra. Lopez-Tromp for di gabinete Wever-Croes, minister Lampe a bisa por ehempel cu si na momento cu lider di su fraccion y partido RED bisa cu nan no tin confiansa mas den su persona, “ami mesora mester bay entrega mi retiro como minister.” P’esey si e tabata den sapato di Sra. Lopez-Tromp, e lo a yega na un otro decision.

Segun minister Lampe, el a yega di expresa esaki na e ex minister awor dilanti di otro ministernan. Pasobra na momento cu partido POR a expresa cu no tin confiansa mas riba Sra. Lopez-Tromp, e ora ey bo mester a tene honor na bo mes y tuma bo retiro, el a declara.

Aworaki e ta mira cu a yega na un culminacion cu minister Lampe a haya cu por a evita for di e momento cu e fraccion y partido POR a kita tur confiansa for di ex mandatario, si e mesun Sra. Lopez-Tromp a tuma su retiro.

E ta kere cu ex minister a purba di hustifica si partido POR no tabatin rason. Te hasta mustra cu e kier combati corupcion, pero supuestamente e partido no. Locual no ta hustifica cu nan kier kita tur confiansa for di dje. Pero minister Lampe ta haya cu si e tabata den e mesun situacion di Sra. Lopez-Tromp, mas ainda e ta presenta su retiro pa e no wordo asocia supuestamente cu un partido cu ta apoya corupcion.

“Ami no kier ta parti di e partido ey. Ami no kier ta representa e partido ey den gobernacion,” el a expresa.

E mandatario a agrega cu ta partido politico cu nan respectivo lista di candidatonan ta bay eleccion cu un programa electoral. Ta pueblo ta dicidi den eleccion via e mayoria pa forma un gobierno. Den e caso aki a resulta un gobierno di coalicion, caminda e tres lider di cada partido den e coalicion (MEP-POR-RED) a firma un acuerdo di gobernacion, y nan a apunta nan respectivo minister a ehecuta nan programa di gobernacion.

P’esey minister Lampe ta haya cu na momento cu un partido ta retira e confiansa di un minister, e regla no skirbi den democracia ta: “Bo ta tene honor na bo mes y bo ta tuma bo retiro. Pasobra bo no por ta un minister sin partido.”