Manera a keda publica den nos edicion di ayera, relaciona cu trabounan pa basha abou Bushiri Hotel, departamentonan di gobierno no a informa publico en general debidamente manera specifica pa normanan di DTI. Sinembargo Bon Dia Aruba a acerca turista ayera atardi pa wak si nan tabata na altura di e trabou tumando luga pa deshaci di asbest. Gerencia y vocero di Divi Hotel di nan banda a confirma cu desde augustus nan a haya un carta di Departamento di Salud unda a alerta e hotel riba e trabounan.

Sam y Pamela Arabias, un pareha turista cu tabata warda pa bus dilanti di edificio di Bushiri Hotel a puntra Bon Dia kico ta pasando cu e edificio cu nan tabata sinta dilanti dje. Pues nan a confirma cu nan no tabata na altura di e trabounan y cu e hotel unda nan ta kedando no a informa nan di esaki. Mirando cu nan hotel ta keda den area high rise, posiblemente e hotel no a haya aviso manera e hotelnan cercano.

Profesionalnan cu conocemento mester ta encarga

E pareha turista a expresa cu aunke nan no tabata na altura di e bashamento, nan ta pensa cu ta bon pa kita e edificio, pasobra e ta ‘hopi mahos y ta daña un area bunita’. Sinembargo sra. Arabias a subraya cu mester trece profesionalnan cu sa con pa anda cu e material peligroso asbest. “Den Pennsylvania por ehempel nos tin hopi edificio bieu, pues tin profesionalnan specifico encarga cu ta trece trahenan di hazmat y otro medidanan cu ta haci e proceso menos peligroso”. Tambe otro manera cu nan ta basha abou edificionan bieu segun sra. Arabias ta pa medio di uza explosivonan na puntonan clave di e edificio. ‘Di e manera aki por bash’e abou mas lihe pasobra e no tin uzo toch’, sra. Arabias a expresa.

Medidanan pa proteha trahadonan

Un otro bishitante di nos isla cu tabata tuma un break di core bicicleta dilanti Certified a splica cu e tabata na altura di e bashamento abou di Bushiri Hotel pasobra un amiga local a inform’e di esaki. E ciclista, kende ta yama Jay, a expresa cu e no tin preocupacion pa e asbest migra den e area. Pasobra segun sr. Jay e ‘no ta posibel pa e material migra mucho leu, pues si tene distancia mes ta suficiente’.

Sinembargo sr. Jay a expresa cu su unico preocupacion pa loke ta trata e asbest, ta e trahadonan cu mester simplemente haci nan trabou, pero cu por trece nan mes den peliger pa via di bin den contacto cu e material.

Divi Hotel a wordo informa pa Departamento di Salud

Vocero di Divi Dutch Village y Tamarijn Alex Nieuwmeyer a confirma na Bon Dia cu e hotel a haya un carta di parti di Departamento di Salud cu a informa e hotel riba e trabounan cu lo ta tumando luga na Bushiri Hotel. Segun sr. Nieuwmeyer y gerencia di e hotel, e departamento a avisa cu trabounan lo ta cuminsando desde september. Sinembargo e trabounan a cuminsa recien pues nan no a cuminsa na tempo. E departamento a informa nan tambe cu pa via di biento lo tin un chens cu asbestos of stof en general por yega na e hotel.

Loke e hotel tabatin suerte cu ne, segun sr. Nieuwmeyer, tabata cu e parti All Inclusive di e hotel ta wordo renoba actualmente, pues e hotel no tabatin mester di tuma algun medida extra pa loke ta trata avisa of muda nan clientenan. Segun Nieuwmeyer, e departamento a avisa cu e trabounan lo dura mas o menos 6 a 7 siman pa completa.

Hotel a bay un reunion cu DOW
DOW te hasta a invita representantenan di hotel pa splica tur e medidanan cu e departamento lo tuma pa percura pa siguridad di esunnan concerni. Pa via di esaki sr. Nieuwmeyer a expresa cu ‘nan a haci tur cos hopi organisa’. Pues e ta convenci cu nan lo ehecuta e plan debidamente.

Sr. Nieuwmeyer no a bay den detaye kico e reunion cu DOW tabata encera ni cual e plannan ta. Loke e plan ta encera no ta hopi claro te ainda, pues nos lo purba tuma contacto cu e departamento pa asina aclara kico ta e medidanan cu ta wordo tuma.