Aunke proyectonan piloto a demostra nan beneficionan: Tin resistencia den diferente nivel di enseñansa contra Scol Arubano Multilingual

Un proyecto cu ministerio di Enseñansa, Ciencia y Desaroyo Sostenibel tabata vocifera constantemente y boga pe a cay den un letargo pa basta tempo ta esun di scol multilingual.

E mandatario encarga cu e cartera aki, Armando “Rudy” Lampe, a declara na Bon Dia Aruba cu recientemente nan tabatin un encuentro cu e cabesante di scolnan publico, unda nan a duna un ’empuhe extra’ na loke ta Scol Arubano Multilingual (SAM).

E mandatario ta sinti cu ta existi un sorto di resistencia cu e implementacion di e SAM. Minister Lampe a bisa cu e resistencia aki ta bin for di diferente nivel di enseñansa. Te hasta nan ta haya cu mayornan ta pensa pa nan yiunan siña miho den Hulandes y no den Papiamento.

“Pasobra den Papiamento bo no ta bay niun caminda cune. Asina ta wordo bisa…” e mandatario a laga sa. En bes cu nan ta mira – segun e mandatario – cu ta trata di e desaroyo di un mucha.

Pero e ta haya cu e resistencia aki ta comprendibel pasobra pa algun siglo nos a conoce idioma Hulandes den nos sistema di enseñansa. P’esey e ta haya cu e ta un cuestion di mentalidad cu “nos ta pensa cu Hulandes ta e vehiculo den enseñansa.”

E ta deduci cu un cambio di e magnitud aki den nos sistema di enseñansa, caminda ta mustra cu Hulandes no mester ta e idioma di instruccion pa bo ta exitoso ta tuma su tempo. Ya varios proyecto piloto a mustra cu dos scolnan, Colegio San Hose y Colegio Conrado Coronel, caminda nan a introduci Papiamento den nan sistema escolar primario, e no a kita nada di menos dominio di por ehempel Hulandes. Ademas e ta haya cu bo ta crea ciudadanonan mas critico y analitico. Asina e rapport di e proyecto piloto aki a mustra.

E empuhe extra aki tin di haci cu e parti di motiva e directornan di scolnan publico pa e prome añanan implementa e metodonan di scol multilingual, cu ya ta cla caba. Unda e muchanan por drenta den contacto cu un di e cuater idiomanan: Papiamento, Hulandes, Ingles y Spaño. Y den e mesun momento tambe encurasha nan pa tur mucha di 4 pa 8 aña pa nan siña lesa y skirbi den nos idioma materno.

E mandatario ta spera cu dor di e empuhe aki e proyecto di SAM por wordo acelera den nos scolnan publico. Pero nan mester keda convence tur hende den enseñansa cu e ta positivo.