Dialuna ultimo den Parlamento di Aruba, minister Rocco Tjon a duna informacion tocante introduccion di “Wetboek van strafvordering” nobo cu ta bay drenta na vigor dia 1 di april, brindando mas derecho na e victima, detenido y tambe pa facilita e trabao na Cuerpo Policial, segun e mandatario a sigura.

Carta di Ordo di Abogadonan di Aruba

Sinembargo, un carta a yega Parlamento dialuna ultimo di Ordo di Abogadonan di Aruba na unda e nota cambio relaciona cu wetboek van strafvordering nobo, como tambe otro coreccion y aclaracion. Mediante e carta aki nan ta expresa nan obhecion na e nota di cambio, mirando cu ta “viola gravemente derechonan fundamental di e sospechosonan den un detencion humano,” segun e carta ta señala.

Den e carta aki, ta indica cu segun ley actual, e periodo di detencion maximo ta di dies (10) dia durante cual, cu excepcion di circunstancianan special, e sospechoso ta permanece den un cel di polis. Segun e ley nobo, e periodo maximo di detencion ta bay ta di seis (6) dia. Despues di a transcuri e periodo di detencion, lo por ordena prison preventivo di e sospechosonan. Prison preventivo ta inclui custodia y detencion.

E periodo maximo di bewaring ta di diesseis dia (16) segun e ley vigente y diescuater (14) segun e ley nobo.

E texto nobo di wetboek van strafvordering adopta dia 22 di october di 2020 ta establece explicitamente cu e detencion solamente por ehecuta den un centro di detencion y por lo tanto, no den un cel di polis, a menos cu hues comisario ta determina lo contrario. Esaki pa motibo cu e celnan di warda di polis no ta cumpli cu e rekisitonan minimo estableci pa un luga na unda por ehecuta un prison preventivo. Sinembargo, mediante e nota di cambio, ta importante e articulo di e ley cu ta stipula cu e detencion, den principio, ta bay aplica solamente den un centro di detencion cu ta premira pa drenta na vigor cu e wetboek van strafvordering. Retrasa e entrada na vigor di e articulo di e ley cu ta exigi e cumplimento di e detencion na un centro di detencion ta inaceptabel pa Ordo di Abogadonan di Aruba y loke por bira pio ta cu no por duna un schedule pa aplasa esaki y e periodo por ta hasta di cinco (5) aña despues di entrada na vigor di e ley nobo.

Exposicion di motibo di e nota di cambio ta expone e argumento cu “den practica, e articulo 94 ta parce no ta aplicabel awor debi na falta di espacio fisico na KIA. KIA ta consisti di dos parti, un di nan ta funciona como centro di prison preventivo mientras e sospechoso ta warda pa un huicio y e otro parti ta funciona pa ehecucion di sentencianan despues di e huicio. Te ainda no a fundamenta cu ta existi falta di espacio pa e parti cu ta funciona como centro di detencion, ademas no por confia den e practica actual, ya cu e ley nobo ta eleva e nivel di e motibonan di prison preventivo.

E carta ta continua señalando cu for di 2013 ta existi un Caribish Wetboek van Strafvordering cu tabata contene e texto nobo di e articulo 94, manera a ser adopta na 2020. Por lo tanto nan ta considera cu tabatin suficiente tempo pa tuma e disposicionnan necesario den e periodo prome cu e introduccion. E supuesto interes den un tardansa mayor cu cinco (5) aña no ta supera e interes di e sospechosonan den e implementacion di e Wetboek van Strafvordering, incluyendo e articulo 94 adopta for di 2020. Instalacionnan alternativo menciona den exposicion di motibonan di e modificacion te ainda no ta disponibel pa 1 di april 2024, tampoco sa ki dia e ta bay ta cla. E supervision electronico tampoco ta desaroya y ta falta recursonan y organisacion pa esey manera Ordo di Abogadonan di Aruba ta bisa.

E celnan di warda di polis ta leu di ta adecua como centro di detencion provisional y no ta cumpli cu e rekisitonan material cu Comision Europeo di Prevencion, Tortura y Trato Inhumano (CPT) a constata durante añanan y na unda a varios biaha a duna diferente recomendacionnan sin cu esaki a ser aborda adecuadamente, CPT tabata spera cu bao e regimen di Wetboek van Strafvordering no tabata posibel mas permanece den un cel di warda di polis durante mas cu tres (3) dia. Como resultado di e nota di cambio, e sospechosonan por keda cera den celnan di polis entre diesshete (17) pa binti (20) dia, tres (3) of seis (6) dia di inverzekeringstelling y diescuater (14) den bewaring. “esaki ta contradeci directamente e alcance di e articulo 9, adopta for di 2020, cu segun exposicion di motibonan ta basa den e criticanan di CPT.

Durante e detencion na cel di warda di polis, e sospechosonan normalmente ta sali pa tuma aire un biaha pa dia, si por. Debi na falta di personal , tin biaha esey no ta sucede pasobra no tin luga pa tuma aire. No ta existi un supervision constante di parti di personal di CEA. Den oranan di anochi, agentenan di polis ta presenta cada dos of cuatro ora pa controla e sospechosonan y duna nan awa. Sospechosonan no por yama ni nan famia ni amigonan, no tin un ventilacion adecua y e instalacion pa drumi no ta esun miho.

CPT den su rapport di 24 di november 2022 ta rechasa e celnan y a adverti cu e sospechosonan no mag di permanece deteni den e celnan aki di warda di polis pa mas di tres (3) dia.

CPT a pidi na autoridadnan di Aruba pa revisa e sistema di detencion na wardanan di polis, por lo tanto, Ordo di Abogadonan di Aruba a solicita no adopta e modificacion di e propuesta, e carta aki ta firma pa Grasita L. Griffith.

 

Contesta di minister Tjon pa e carta

Den su ponencia na Parlamento di Aruba, minister encarga cu Husticia y Asuntonan Social, a bisa cu esaki ta “algo bon” y cu pais Aruba lo ta prome den Reino cu ta bay introduci esaki, “tin hopi punto positivo pa loke ta trata derechonan di e victimanan, derechonan di e detenidonan pero tambe ta brinda na Cuerpo Policial den e caso aki, e autoridad pa por haci nan trabou mas eficiente y mas eficaz,” el a bisa.

Igualmente, el a sigura cu den su opinion tur partido ta gana cu e introduccion di e Wetboek van Strafvordering aki.

Un di e retonan principal segun el a señala, ta e capacidad di detencion y falta di personal cu tin na e momentonan aki den full e cadena, esey ta e motibo dicon a entrega e nota e di cambio dia 27 di februari pa un articulo solamente no ‘trek in werking’ mesora, sino den un fecha cu ta determina despues pa brinda e cadena hudicial espacio pa por traha riba e diferente puntonan.

Minister Tjon a expresa cu ta e comparti e preocupacion di Ordo di Abogadonan di Aruba pero p’esey tambe e mesun comision tambe ta bay percura pa por introduci e Wetboek y otro alternativanan pa por mitiga e preocupacionnan. Ademas el a sigura cu nan lo percura pa mas dia posibel algun di e celnan lo ta adecua pa por ehecuta e detencion.

Maske Ordo di Abogadonan di Aruba a entrega e carta aki y a mustra nan preocupacion, e ley a keda aproba cu 16 voto na fabor y 1 voto den contra