Aunke no tin cifra, ainda Economia di conocemento lo trece un impacto economico

ORANJESTAD – No tin un estudio ainda cu por refleha cuanto economia di conocemento ta aporta na nos economia. Esaki considerando cu e ta un di e seis pilarnan di e plan economico cu gobierno a presenta.

Minister di finansa y asunto economico, Xiomara Ruiz-Maduro a declara na Bon Dia Aruba cu na su conocemento, no tin un estudio cu por duna un bista den cifra di e aporta cu por ehempel e sector di economia di conocemento, manera Universidad di Aruba y otro institucion tecnico y di educacion superior, ta contribui na nos economia.

“Tur esaki ta bay trece cune un impacto economico,” el a bisa.

Aunke e no ta midi, nos por premira cu e lo contribui pa nos economia. Otro parti importante ta cu Aruba ta bay acumula un experticio den conocemento, cu ta uno cu nos por exporta. E ta haya cu esaki ta un balor agrega di e facultad nobo cu ta na caminda caba.

E mandatario a referi na e proyecto di un facultad nobo SISSTEM (Sustainable Island Solutions through Science Engineering Technology Mathematics) na Universidad di Aruba, cu lo ta aloca den e edificio monumental y actualmente bandona, di Maria Convent.

E renobacion di e edificio aki -segun Ruiz-Maduro- ta trece hunto cune trabou pa e contratistanan. Despues nan tin cu ekipa e luga aki, y tambe bin cu un team di maestro. Practicamente tur maestro mester bin di afo, ya cu e meta principal tras di esaki ta pa training 12 post doctorado of PhD pa tuma e proyecto aki over despues di 3 aña.

Igualmente, e plan aki ta contempla cu den e prome aña tin 9 PhD cu lo wordo tuma pa por implementa e facultad aki. P’esey e no tin duda cu e proyecto aki cu ta cuadra cu e concepto di economia di conocemento, lo duna un empuhe na nos economia.

Tambe e bisindario lo beneficia di dje, ya cu negoshinan manera restaurant ta bay draai miho. Unabes cu nos ta ricibi studiantenan di afo, e lo yuda nos economia tambe. Ya cu e vision ta cu e facultad di SISSTEM lo bira un catalisado di studiantenan den nos region. Nan lo bay tin mester di vivienda, huur auto y otro consumo, cual tur lo contribui na nos economia.