Mediante un comunicado di prensa, Ministerio Publico a informa cu Corte Superior a duna instruccion na nan pa persigui dos agente policial riba sospecho di homicidio den un caso cu a tuma luga na september di aña 2020 na un cas na Sero Pita.

Relaciona cu e instruccion aki, Ministerio Publico lo cita e polisnan pa presenta dilanti hues. E caso lo bin dilanti Corte dentro di un tempo.

E decision di Corte Superior tin di haci cu un keho segun articulo 15 di Buki di Procedemento Penal di parti di famia di un persona cu a perde su bida despues di a wordo tira pa polis dia 28 di september 2020. Landsrecherche a cuminsa un investigacion penal, for di cual a sali (na opinion di Ministerio Publico) cu e polisnan envolvi a actua den defensa propio. Siguientemente fiscal di husticia a seponeer e caso.

Corte Superior a dicidi awor cu e punto di salida mester ta semper cu un caso, en principio, mester wordo hiba dilanti hues si ta trata di sospecho di un hecho castigabel hopi grave caminda un persona a fayece. Pues esey ta loke ta bay pasa awor cu citacion di e dos polis. Ministerio Publico ta sigui riba e posicion cu ta trata di defensa propio.

Hechonan di e caso

Dialuna 28 di september, comunidad di Aruba tabata den conmocion pa e caso cu a tuma luga e den oranan di anochi na un cas na Sero Pita. Por a compronde di parti di Cuerpo di Polis di Aruba cu segun nan a bisa mediante un comunicado di prensa den e dianan ey cu “pa 10or di anochi, patruya di Santa Cruz ta wordo manda na un cas na Sero Pita pa un hende homber agresivo y cu ta kibrando cosnan den cas.”

Na yegada di patruya ta pidi pa refuerso di un otro patruya, “na dado momento e persona lo mester a bin ataca e polisnan na unda a saca e arma reglamentario y a los tiro.”

E homber en cuestion a wordo alcansa y na yegada di ambulance, lamentablemente no por a haci nada mas; Dr. Texier a constata morto di e meneer W.P.B. naci na Colombia di 48 aña di edad.

Familiarnan di Peña tambe a publica un comunicado mediante Bon Dia Aruba dia 2 di october 2020 indicando con e suceso a tuma luga y e diferente inconsistencia cu tabata existi den e caso aki na unda “un persona a muri door di 5 tiro y tur esaki a sucede den presencia di su casa y su yiunan cu tambe por a wordo alcansa.”

“Ora Peña a wordo tira el a cay abou. Eynan ta momento cu su yiu homber a grita e polis: Kico bo ta haci, dicon bo ta tir’e? E yiu homber a mishi cu schouder di e polis p’e stop di tira”  y eynan e polis a punta e pistol riba e yiu homber tambe den direccion di su bariga. E polis tabata tembla y tabata hopi spanta, sin sa kico pa haci, e yiunan a cuminsa grita pa yama ambulance.”

Na 2020, nan a haci diferente pregunta pa Cuerpo di Polis di Aruba y Ministerio di Husticia como por ehemplo: Na ki momento un polis ta yega na e derecho pa kita un ser humano su bida? Ki ora si? Ki ora no?

Den e comunicado tambe, e famia a bisa: “kico ta ser haci pa un departamento asina importante di Isla Aruba y cu unda e pueblo ta depende completamente di un cuerpo policial pa para banda di e pueblo pa defende, cuida y proteha tur den cualkier situacion. Ora un caso di e manera aki asina ta presenta, na ki momento nan por usa nan arma di candela si e otro persona no tin igual? “Nos tin un maneho y of structura cu ta bisa stap 1, despues stap 2 y si no logra stap 3 y tira? Nos famia ta desea un splicacion y un aclaracion riba e uso desproporcional di arma di candela, manera nan ta bisa, pa nan defensa propio of ora nan sinti nan mes ‘menasa’ pa nos tata. Ki dia nos lo haya husticia?”

Mas cu dos aña despues di e suceso lamentabel aki, Corte Supremo aki a indica dia 1 di maart di e aña aki cu “Corte a tuma como punto di partida cu Ministerio Publico ta bay cuminsa un accion penal den caso cu un persona a muri como consecuencia di un homicidio imboluntario, un hecho evidentemente hopi grave y cu solamente den casonan excepcional tin un margen pa desvia di e punto aki.”

Corte ta considera cu enhuiciamento di e dos polis acusa ta factibel, ta confirma e denuncia y ta ordena un huicio pa e dos polis aki cu ta acusa di homicidio imboluntario (doodslag).