Jan van Nes di Aruba Food & Beverage Association (AFBA) a duna na Bon Dia Aruba un up date di e sector aki den cuadro di e temporada actual.
E ta haya cu bao circunstancia normal prome cu Covid a dal nos, e sector aki a yega di experiencia un luna di december cu e prome 20 dia di december tin un movemento turistico modera. Pero despues di dia 20 di december y durante un trayecto di dos siman, nos isla ta conoce un volumen considerablemente grandi di turista.
Pero e aña aki, ainda cu e pandemia di Covid, nan ta mira e mesun trayecto. Sinembargo teniendo na cuenta cu e ocupacion ta mucho mas abao. Pero si nan ta compar’e cu luna di november ultimo, AFBA ta haya e prome dos siman di december cu e actividad ta mas of menos modera.
Sr. van Nes a bisa cu esey nan por a wak den e ultimo weekend y nan ta presenti cu pa Pasco, e ta bay ta miho. Pero logicamente no na e nivel di ocupacion cu nos isla a conoce di 90 pa 95 porciento.
Sinembargo pa e cantidad di restaurant cu posiblemente no a habri ainda, e temporada di fiesta aki di Pasco y Fin di Aña di tur modo ta bonbini. Ya cu esaki ta nifica toch un poco mas turista y logicamente un poco mas cliente.
E dianan operacional aki cu ta mustra un tendencia di mehora, pero nan no ta ariba di ‘break even’. Pues AFBA no por bisa cu e luna aki nan a sali caba for di e ‘red zone.’ Pero si nan ta mira cierto mehora y nan ta mantene nan optimismo pa cu e luna prometedor di december.
