Ayera minister di Finanzas, Economia y Cultura, Xiomara Maduro a reacciona bisando cu gobierno a cumpli cu tur pago corespondiente y destina pa AZV.

El a declara cu gobierno no debe AZV. Tur loke a drenta den nan caha pa concepto di e primanan destina pa nos seguro medico general a wordo paga. Tur saldo ta na cero y pago di suma presupuesta cada luna a wordo paga, y no tin cuentanan habri te cu luna di augustus. Tambe nan a paga e fondo di 20 miyon cu gobierno a yega di haya for di Hulanda destina pa AZV.

Pero tambe di otro banda el a admiti cu falta di likides debi na Covid crisis ta haci cu AZV a bay substancialmente atras den nan entrada. Nan ta hayando menos den nan fondo destina pa cuido medico di salud di nos comunidad. AZV a bay atras cu 64.1 miyon florin den nan fondo. Pero banda di esey, y pa complementa e situacion dificil aki, un di e condicionnan cu Hulanda a bin cune pa Aruba por ricibi nan ayudo financiero, tabata e cortamento di 5 miyon florin pa luna for di e fondonan di AZV. E ta un golpi duro pa e fondonan destina pa AZV.

Pago AZV

For di punto di gobierno, minister Maduro a duna un bista con e primanan y sumanan presupuesta cada luna (landsbedragen) a wordo canalisa pa e fondo di AZV. Asina e mandatario a argumenta cu tur e entradanan aki gobierno no a keda cu nan, sino cu nan a logra cumpli cu e pagonan corespondiente pa AZV. “Nan a wordo manda di biaha pa e organo aki,” el a bisa.

 

El a ilustra riba e primanan di AZV cu a wordo colecta y cu te cu augustus gobierno a paga nan tambe. Tur locual gobierno a cobra pa concepto di BAZV tambe tur a wordo paga. Aunke nan no por a pasa e placa riba un solo biaha. Te hasta el a bisa cu gobierno a haci su miho esfuerso durante e lunanan di crisis di juni, juli y augustus, caminda nan a manda extra placa pa atende cu e deficit di entrada destina pa AZV. Igualmente el a laga sa cu e balansa riba prima di AZV –cu normalmente tin un balansa habri– pero actualmente ta na cero, unda e ultimo pago a wordo haci dia 27 di augustus ultimo.

Pa loke ta e suma poni den presupuesto di tur aña, gobierno ta cumpli cu tur luna. Aunke el a splica cu durante e prome lunanan no tabatin e pagonan, debi cu ainda e presupuesto no a keda cla.

Falta likides

A pesar di tur e cumplimento aki, e mandatario a trece dilanti cu Covid no solamente ta genera un crisis di salubridad, pero tambe e virus aki a produci un crisis di likides.

A pesar cu tur entrada cu a drenta pa AZV nan a wordo paga, e crisis aki tambe tin su efecto pa e fondo cu ta bay pa nos seguro medico general. Na momento cu nos economia ta draai menos, esaki ta trece cune cu pais Aruba ta haya menos pa loke ta e prima di AZV.

“Esey claramente ta afecta locual ta bira e fondo cu a bay,” el a bisa. Te aworaki e suma total ta 64.1 miyon florin cu a bay menos pa e fondo di AZV. For di januari te cu augustus pa concepto di AZV prime, nan a haya 20.6 miyon menos. Pa concepto di primanan di BAZV, nan a haya 43.5 miyon menos. Esey ta e total di 64.1 miyon cu no a drenta den fondo di AZV durante e delaster 8 luna. E motibo di e esaki ta e crisis di likides debi cu nos economia no ta produci e prima suficiente pa AZV por atende cu nan gastonan.

E ta bira un reto grandi pa e organo aki por cumpli cabalmente cu nan gastonan riba pago di servicio di salud. Pero e mensahe cu e mandatario kier trece dilanti ayera tabata cu for di parti di gobierno nan a cumpli cabalmente cu e pago di tur loke gobierno a colecta destina pa e fondo di AZV.