Aunke benta di ticket aereo ta tumando luga, ainda no tin fecha oficial pa reapertura aereo cu Latino America

A pesar cu ainda no tin un fecha oficial di reapertura di nos frontera cu e region di Latino America, tin compania aereo cu a cuminsa bende ticket entre Colombia y Aruba, entrante luna di november venidero.

Directora di Aruba Tourism Authority (ATA), Ronella Tjin Asjoe-Croes a afirma cu no tin fecha pa e reapertura di e region Latino Americano. Aruba a bin cu un proceso gradual di reapertura di su frontera, despues cu a dicidi di lanta e lock down. Actualmente e ta habri pa Europa (Hulanda), Merca y algun paisnan di Caribe.

Contestando pregunta di Bon Dia Aruba, Tjin Asjoe-Croes a declara den e conferencia di crisis team di diaranson anochi, cu nan ta anticipa cu e lo ta algo cu nos por ta habriendo diferente pais pareu. Funcionario di departamento di Salubridad Publico (DVG) ta analisando hunto cu personal di ATA e cifranan di kico lo por ta e impacto di casonan eventualmente importa for di e region aki.

ATA ta consciente cu tin companianan aereo cu ta bende ticket. Tjin Asjoe-Croes a expresa cu como ATA nan ta hopi agradecido de facto cu e companianan aereo tin e entusiasmo aki. “Nos ta purba di maneha e situacion di e miho manera cu ta posibel,” segun directora di ATA.

E ta haya cu nos tur mester compronde cu e companianan aereo tin cu anticipa riba benta di ticket y mantene nan clientenan informa. “E mundo di aviacion di awendia ta hopi volatil. E ta hopi dinamico…” el a laga sa. ATA ta mira no solamente for di e region aki, sino cu nan ta mira tambe for di Merca cu ta wordo reserva y/of bende ticket. Pero tambe nan ta ahusta y cancela diferente itinerario, y como ATA nan tin comprension pa cu esey tambe. Pero tambe nan ta subraya e importancia di fiha un fecha pa cu e region di Latino America.

Durante e conferencia di prensa ultimo di crisis team, Tjin Asjoe-Croes a cualifica como un bon señal cu tin interes di companianan aereo Mericano pa amplia nan capacidad di asiento aereo pa lunanan cu ta na caminda. Y mescos ta aplicabel pa Latino America, caminda el a referi na Avianca, COPA, Wingo y Aruba Airline.

Pa loke ta trata Latino America, ATA hunto cu cluster medico lo continua e dialogo pa cu e reapertura di e mercado aki. E dialogo a tuma luga e siman aki, y e lo sigui continua proximo siman. Di e forma aki nan por bin cu recomendacion pa crisis team pa loke ta trata fecha di reapertura di e region di Latino America.