Diego De Cuba ~ Presidente di STA
Despues di un periodo sin sa mucho cos di Consumido Arubano Solidario (CAS), nos a haya sa cu actualmente e fundacion aki ta pasando den henter un proceso di reorganisacion. Pa tal motibo nan a bin cu un directiva nobo, unda varios representante di diferente sector, entre nan sindicato, cuido medio, etc., ta forma parti di e constelacion nobo aki.
Presidente di STA, Diego de Cuba a indica cu STA como sindicato ta parti di e directiva di CAS, cu ta bay atende cu e fundacion importante aki cu ta defende e derechonan di e consumidonan. Ademas di e hunta directiva nobo tambe nan ta reorganisando e fundacion pa evalua con nan ta bay atende cu e problema cu diariamente e consumido consciente tin.
CAS kier yega cu algo concreto pa nan demostra gobierno den nan rapport cu e fundacion aki merece e derecho di existencia. Tambe e parti di subsidio of contribucion mester bira mas grandi. “CAS ta un fundacion hopi importante pa e comunidad Arubano pasobra hopi keho ta drenta”, el a bisa.
Nan ta ricibi diferente tipo di keho, ya sea di huur te hasta di aparato defecto cu ta daña lihe y cu no ta bal su placa. Tin hopi mas cos den e rapport cu CAS su directiva nobo ta bay traha riba dje. Nan kier duna CAS full un cara nobo pa atende cu e problemanan di e consumidonan.
E directiva nobo di CAS lo mester ta masha creativo pa maneha nan subsidio limita, pero deal tambe cu ne pa atende cu tur e problemanan cu tin. Sr. De Cuba ta lamenta cu un fundacion manera CAS no ta haya subsidio suficiente pa realisa nan trabou di control debidamente. “E ta wordo subsidia masha marginal.”
Desflacion y aumento di prijs
Otro asunto tin di haber cu CBA (Banco Central di Aruba) ta bisa cu no tabatin inflacion sino mas bien un inflacion ta negativo of desflacion, kiermen cu costo di bida no a subi. E sindicalista ta considera cu esaki ta un triki “cu a wordo hunga rol di e organonan cu tin e cosnan aki” .
E ta haya cu tur hende sa cu e desflacion aki ta imposibel, ya cu ora bo drenta un supermercado ta riparabel cu niun prijs a baha, sino cu tur prijs a subi, incluso servicio. E no ta compronde cu gobierno ta anuncia cu tin un desflacion, y e ta ironico”, segun sindicalista sr. De Cuba.
No ta desconoci -segun e- cu e prijs pa biba na Aruba a bira carisimo, y fin di luna clase trahado y pensionado tin cu lucha pa e placa por yega pa atende nan compromisonan. Considerando e panorama aki, ya caba e ta pronostica cu fundacion CAS tin cu haci un trabou hopi profundo. Nan intencion ta pa berdaderamente bin cu un rapport cu contenido y echonan pa convence gobierno tambe.
“Nos ton cu convence gobierno tambe cu nos tin cu cambia e rumbo di e pais aki. No solamente pa e consumido sino e parti di entrada pa e trahadonan, ya cu defacto nan ta e consumidonan. Pero teniendo na cuenta cu e entrada minimo cu mester ta ariba 2.600 florin pa atende tur compromiso dignamente; mientras cu e salario minimo ta ariba 1.677 florin, nos ta mil florin leu fo’i cas.”
P’esey sindicalista De Cuba ta kere cu e directiva nobo di CAS tin cu profundisa riba dje pa convence gobierno cu e placa cu e clase trahado ta ricibi den su man ta insuficiente mirando cu tur prijs a subi. Diferente componente manera huur, awa y coriente no a baha, mientras gasolin ta subi y baha manera un yoyo, asina e sindicalista ta finalisa.
