Aunke Aruba ta birando un sitio di encuentro memey di pandemia; Mayoria di nos bishitante ta bin di vakantie

Aruba ta birando un destino di encuentro considera como ‘safe’ meymey di e pandemia. Pero tambe debi na e restriccion cu tin di vuelonan tanto nacional como internacional den henter mundo.

Sinembargo Aruba su nomber a cuminsa resona mas y bira mas atractivo pa esunnan cu por a yega di scucha su nomber, pero nunca por a imagina di pasa un vakantie y/of un re encuentro inolvidabel den dje.

Aruba Tourism Authority (ATA) ta consciente cu e situacion aki ta pone nos isla den un posicion mas privilegia cu otro destino turistico. “Diferente pareha ta opta pa biaha y pa topa aki na Aruba,” asina directora di ATA, Ronella Tjin Asjoe-Croes, a declara na Bon Dia Aruba.

ATA ta mira e tendencia aki, principalmente bao parehanan, unda un ta na Merca y e otro na Europa.

Isla di encuentro

Esaki ta e caso di e feliz pareha, Milana Ram y Himanshu Bhaisare kende nan despues di permanece varios luna separa for di otro debi na e coronavirus, nan a topa na Aruba bek.

Aruba su nomber ta hayando echo den henter mundo riba con nos bon maneho riba e virus a haci cu -for di 13 di maart cu a wordo conoci e prome dos casonan te cu ayera- a wordo registra oficialmente 119 caso positivo di coronavirus di cual 14 di nan ta activo. Tur esaki a contribui pa nos industria turistico fuertemente golpia pa e virus aki, ta construyendo keto bay un nicho nobo di Aruba como un isla di encuentro of reencuentro.

Esaki ta e prome biaha cu Milana y Himanshu ta bishita Aruba y nan no ta absolutamente arepenti di nan decision. Mas bien, nan ta dispuesto pa sigui frecuenta nos isla. Ademas cu e isla aki a bira un escenario safe cu a brinda nan e posibilidad di por a comparti hunto pa un par siman, e ta un destino bunita y cu hendenan amabel.

Nan luga di residencia ta San Francisco (Merca), pero dos aña pasa Milana, kende ta ingeniero electronico di profesion, a wordo recluta pa un compania multinacional pa bay traha na Hulanda. Mientras cu Himanshu a keda trahando na Merca.

Generalmente cada dos luna e pareha aki ta custumbra di topa un caminda, pero awor debi na e pandemia, Himanshu no por bay Europa y su casa no por bay Merca. Ta asina cu pa bira realisa nan deseo di encuentro, nan a cuminsa check, y finalmente nan scoge Aruba pa topa, caminda nan a haya Milagro’s Garden Apartments, via Airbnb pa bira nan luga pa keda.

Nan ta aplaudi e manera con Aruba ta atendiendo cu su turismo, a pesar di e reto cu coronavirus ta trece cune. Milana a haci su test na Hulanda prome cu el a bini Aruba, y Himanshu a haci e mesun cos na Merca. Pero unabes cu cada un di nan a yega Aruba, nan a sigui e protocol y tambe nan a haci nan test akinan. Ya caba nan tin varios dia disfrutando di nos beachnan, y demas sitionan cu Aruba ta ofrece.

Tanto Milana como Himanshu ta sinti nan mes safe na Aruba den tur sentido di palabra. Pero pa loke ta e peliger di haya e virus, nan ta haya cu na Aruba ta wordo cumpli cabalmente e reglanan y nos control ta hopi stricto. Sinembargo nan ta prefera di disfruta di sitionan abierto, y nan ta evita e sitionan cera. Aunke nan a yega di disfruta di nos gastronomia, pero nan a ripara cu e trahadonan di e restaurant tabatin mask bisti.

ATA

Den e contexto aki y uzando e ehempel specifico di Milana y Himanshu, Bon Dia Aruba a acerca directora di ATA, Ronella Tjin Asjoe-Croes, kende a bisa cu tin cierto tendencia cu Aruba ta birando un destino di encuentro. Sinembargo e halto ehecutivo di ATA a mustra cu mayoria di hende ta bin Aruba pa vakantie. “E ta e patronchi usual di Mericanonan pa loke ta trata Aruba,” el a bisa.

Pa loke ta e localidad unda nos bishitante ta kedando den e periodo, desde cu nos a habri nos frontera, mayoria di nan ta kedando den hotel, esaki ta loke ATA por mira den cifra. Ya cu AHATA a indica cu nan grado di ocupacion pa juli lo ta alrededor 9% y pa augustus 18%.

Mientras cu Aruba Timeshare Association (ATSA) a indica ATA cu nan grado di ocupacion por ta 33% den luna di juli y 37% den e luna di augustus.

Esaki ta mustra cu timeshare ta mas cerca di 40% den nan grado di ocupacion, durante e dos luna di reapertura caba. Pa Tjin Asjoe-Croes, esaki ta un bon señal. Mientras cu AHATA ta move step by step. Tampoco mester descarta cu tin otro grupo di bishitante cu ta keda den otro tipo di acomodacion tambe, manera Airbnb.

Tjin Asjoe-Croes a laga sa cu por mira e impacto di timeshare cerca e hendenan cu ta bin Aruba, caminda nan edad ta varia. No solamente nan ta hende jong, sino hende grandi tambe. Mayoria di nos bishitantenan ta bin di Merca.