Den e Strategia y Plan di Accion Nacional pa Biodiversidad 2024-2030 publica pa Departamento di Naturalesa y Medio Ambiente (DNM) den luna di september ta subraya e desaroyo di ecosistema y biodiversidad di Aruba y puntonan esencial pa mehora esaki den futuro
Segun e documento ta indica, na Aruba, e estudio di The Economics of Ecosystems and Biodiversity (TEEB) a ser usa pa balornan socioeconomico di fuente di diferente servicio di ecosistema. Un perspectiva economico, y antropocentrico, ta ser provee caminda e dependencianan ta ser captura y calcula.
E estudio aki ta bisa cu e contribucionnan directo di turismo ta conta pa 28.6% di e GDP total. Ora cu combina esaki cu e contribucionnan indirecto, esaki ta yega 88.1%, y ta anticipa pa e balor aki yega 97.4% pa 2027.
P’esey, e crecemento, beneficionan di empleo y recompensanan economico di e industria di turismo ta directamente relaciona cu Aruba su atributonan di medio ambiente. Fuera di turismo, e poblacion di Aruba ta depende riba hopi otro servicio cu su ecosistemanan ta provee.
Por ehempel, anualmente e industria di pesca ta provee su capital natural relaciona cu un balor di 4.45 miyon dollar, balor cultural ta provee su capital natural relaciona cu un balor di 3.6 miyon dollar, y e balor di retiro di carbon ta provee su capital natural relaciona cu
un balor di 109 mil dollar.
DNM ta remarca cu turistanan di Aruba no ta e uniconan cu ta depende di e bienestar di e ecosistemanan y nan servicionan. Tin un vinculo fuerte y dependiente entre naturalesa y e bienestar di e ciudadanonan di Aruba. Mayoria di e residentenan ta bishita e atributonan ambiental di e isla pa relaha y pa conecta cu famia y amigonan. Medio ambiente ta un componente esencial di bida y cultura Arubano.
E NBSAP ta destaca cu e localnan ta mustrando mas y mas nan preocupacion riba e estado actual di Aruba su bienestar ambiental, y e futuro di e pilar economico principal, turismo. Un ehempel recien di esaki cu nan ta menciona tabata e protesta riba Dia di Rey riba 27 di april 2024, tocante e crisis ambiental actual cu Aruba ta confrontando. E protesta teni tabata
pa urgi gobierno pa atende e crisis aki, stop e sobre-construccion di hotel, haci naturalesa un prioridad, y exigi husticia di clima pa Arubianonan local.
DNM ta indica cu globalmente, naturalesa ta deteriorando a pesar di esfuersonan pa conserva y restaura esaki. Naturalesa riba un isla tropical chikito ta particularmente sensitivo na presionnan. A pesar di nan nificacion, e ecosistemanan di Aruba a ser constantemente degrada durante e ultimo añanan debi na presionnan local manera desaroyo di e costanan,
piscamento di mas, destruccion fisico y disturbio causa door di actividadnan recreativo y turismo.
Nan ta señala cu e motornan aki di degradacion di ecosistema por cada biaha afecta mas e capacidad di Aruba pa brinda su servicionan di ecosistema. Por ehempel, turistanan lo no por disfruta di playanan limpi y bunita pa motibo cu personanan ta deshaci di nan desperdicio di un forma cu no ta adecua.
Nan ta agrega cu debi na perdida di rifnan di coral y biodiversidad marino, nan tambe lo ta menos inclina pa tuma parti na actividadnan recreativo manera buceo. Pa ilustra e reto pa
expancion urbano, di 1986 te cu 2020, Aruba su medio ambiente construi a aumenta di 29 pa 60 km2 traduciendo na un tercera parti di e isla. Progresando riba tendencianan actual
lo aumenta e presionnan y suprimi e capacidad di Aruba pa enfrenta e retonan.
E estado actual di naturalesa ta degrada, y Aruba tin hopi tempo caba cu a surpasa su capacidad di carga. Como resultado, e suministro di servicio di ecosistema na e hendenan di
Aruba ta core riesgo.
DNM ta splica cu pa ilustra esaki, Wolfs Company hunto cu Yabi Consultancy (2018) a calcula un perdida di 50% den bishitante debi na degradacion di medio ambiente. Pa
atende e demanda anticipa pa labor impulsa pa e proyectonan di construccion di cambernan di hotel adicional, pronosticonan ta calcula e afluencia di entre 20 mil pa 25 mil habitante nobo pa e isla den e añanan binidero.
E documento ta resalta cu e aumento significante aki den poblacion lo conduci na un
sobresaturacion di e demografia di e isla, cu consecuencia cu rango amplio. Scarsedad di vivienda, tension den infrastructura, y aglomeracion trafico ta ehempelnan di e retonan cu ta ser spera.
Pa medio di esaki, e implicacionnan ta extende mas leu cu dimensionnan socio-economico y cultural; e impacto ambiental riba e ecosistemanan natural di Aruba probablemente tambe lo amplifica.
NBSAPta remarca cu un mentalidad nobo pa plania y actua pa harmonisa naturalesa y
hende manera e ta relaciona cu desaroyo di Aruba ta necesario pa reduci menasanan causa pa hende. Cambio di comportacion ta necesario pa sostene e otro accionnan.
For di maart pa juli 2024, DNM a colabora cu stakeholdernan den henter gobierno y sociedad pa formula un NBSAP cu ta sigura e harmonisacion di naturalesa, y su servicionan di ecosistema, den e desaroyo di Aruba – awor y den futuro.
E proceso di mulitple paso a cuminsa cu sesionnan di stakeholder en persona, cu ta encera diferente stakeholder di henter gobierno y sociedad pa recoge input. Esaki a sigui pa e desaroyo di un cuadro strategico di acuerdo cu e Global Biodiversity Framework (GBF).
A sigui pa un proceso di validacion digital cu a ser conduci cu stakeholdernan pa garantisa sosten amplio y exactitud. E ultimo paso a encera finalisa e NBSAP cu un legitimidad
control door di bureau di Minister di Naturalesa pa sigura cumplimento.
