Aumento salario minimo ta ilegal y SER ya a conseha contra

E aumento di salario minimo aworaki ta ilegal. Motibonan por haya den nos editorial di awe. Banda di esaki SER ya a conseha gobierno na 2016 pa no hisa e salario minimo.

Conseho Social Economico (SER) a conseha pa no aumenta salario minimo entrante januari 2017. Esaki ta resulta di nan conseho cu ta data di november aña pasa, riba peticion di ministro encarga cu asunto di bienestar e tempo ey. For di e rapport di SER ta resulta cu no ta mira espacio pa aumenta salario minimo, bao ningun di e dos posibilidad cu ley riba salario minimo ta brinda.

E prome variante ta e aumento a base di inflacion, calcula a base di e diferencia den indice pa consumidor (CPI) entre augustus di e aña anterior (2015) pa augustus 2016. Como cu den e periodo ey e cifranan registra na Oficina Central di Estadistica tabata indica hasta un deflacion (aumento di poder di compra), unda cu e CPI a cay cu -1,4%, no tabata posibel conseha un aumento. Otro inciso di articulo 13 di e ley (inciso 3) ta contempla aumento di e salario minimo a base di un espacio economico, carga pa un desaroyo faborabel di economia. Aki tampoco SER tabata constata un situacion faborabel, ya cu segun cifranan di Banco Central e crecemento real chikito di 0,4% premira pa 2016 a cambia negativamente a base di e situacion durante 2016, cu a causa un revision di crecemento positivo pa un caida di -1,6% di e Producto Interno Bruto, segun calculacion di Banco Central na e momento ey (november 2016).

Encuanto e perspectivanan pa 2017 e Conseho a trece dilanti cu pa motibo di e incertidumbre encuanto e inversionnan den rehabilitacion di e refineria y tambe e desaroyonan insigur den turismo, no ta mira un base pa carga un aumento di e salario minimo na januari 2017.

Na inicio di 2017 gobierno a dicidi di no a aumenta salario minimo. Pa mas den aña gobierno atende e asunto di nobo, SER lo mester a haya un peticion nobo pa conseha riba e intencion di gobierno pa aumenta e salario minimo pa 1 di augustus 2017, manera a anuncia awor. No tabatin peticion y por lo tanto tampoco conseho di SER riba esaki. Segun articulo 13 di e ley, den tur caso e conseho di SER ta imperativo.