Miho pensa tres biaha prome cu hacie
Nos a comprende di e mandatario responsabel pa asunto laboral cu e ta considera seriamente aumenta e aña aki ainda e salario minimo. Y no cu un suma chikito di 10 of 25 florin pero cu algo di minimo 100 florin. Si e ministro tabatin gana di yama reaccion for di sector priva, e por ta sigur cu el a logra esey. No lo tarda mucho pa e gremionan empresarial cuminsa critica e posicion cu e ministro a tuma den esaki. No ta bay pa na e momento aki evalua si esun tin rason y e otro no, pero ban cuminsa cu tira un bista riba e aspectonan cu semper mester tuma na cuenta prome cu dicidi.
Esey ta importante pasobra ta fresco den nos memoria ainda con aña pasa, den pleno campaña, e gobierno di e momento ey, sin consulta cu Conseho Socio Economico (SER), pues contra ley, a aumenta e salario minimo na augustus, faltando apenas un luna pa eleccion tuma luga. Mira for di punto di bista di un politico den campaña por a anticipa un move asina, ya cu e adversarionan politico hamas lo a bay bisa cu no tabata corecto, pasobra ningun hende kier perde voto asina cerca eleccion. Asina henter e asunto a pasa bay cu poco publicidad, pasobra tabatin topico mas cayente pa atende.
Mientras tanto nos tin un otro gobierno, cu no ta bay eleccion proximamente, asina leu cu nos sa, y ta necesario pa atende un asunto serio asina cu e debido consideracion. Na prome luga esey ta implica cu mester cana e caminda corecto, scuchando esunnan cu mester scucha. Basicamente nos sistema legal conoce dos opcion pa yega na aumenta salario minimo. E prome ta cu a base di e inflacion, den e caso aki di augustus 2016 te cu augustus 2017, ta dicidi pa aumenta e salario. Esaki mester sucede na e siguiente comienso di aña; esey ta tras di lomba caba. Si tabata di haci esey anto e anterior gobierno mester a cuminsa cu e proceso di consulta prome cu nan a baha, loke nunca a sucede. Ademas lo mester tira un bista riba e inflacion mes… no tabatin inflacion at all na 2016 y 2017, punto.
E otro opcion legal ta cu tin un crecemento economico tal cu esaki ta hustifica pa e trahadonan cu e salario mas chikito comparti den esaki tambe. Pa esey nos mester tira un bista riba con nos economia tabata andando den e ultimo aña, y e aña coriente. Nos no tin cifra definitivo ainda di con 2017 a bay, pero por ta cu tabatin un crecemento limita. Den su economic forecast monitor di fin di december Banco Central a indica un crecemento di GDP real di 2,6% pa 2017, cu 2,6% di GDP nominal tambe, es decir no tabatin influencia di inflacion o deflacion, manera bisa anteriormente. Tambe Banco Central ta adverti, cu si no por conta cu aportacion di e refineria, nan perdicion pa 2018 ta baha di 2,7% pa solamente 1%. Nos a scucha mientras tanto di gobierno, cu no ta bay conta cu e refineria e aña aki mas pa cu presupuesto. A buen entendedor… Anto, e 2,6% di aña pasa y e 1% di e aña aki por ta base pa un aumento di salario minimo? En todo caso no di un aumento di Afl. 100,- cu lo ta un aumento di 5,8%, cu ta parce nos algo fuera di alcance,cu sector priva dificilmente por carga. Den tur esaki mester corda tambe cu nos economia ta apenas recuperando di dos aña duro, den cual tabatin un recesion luga di avance.
Di tur manera e discusion di semper, e gap cu tin entre salario minimo y e minimo di subsistencia pa un individuo cu ta net riba Afl. 2000,- ta dificil pa cera, sigur si nos no por aumenta productividad drasticamente den un economia di servicio principalmente. Aumenta salario minimo asina, cu su consecuencia riba henter e structura di salario, por significa un aumento di gasto di payroll grandi, cu empresarionan lo busca manera pa optimalisa produccion, restructurando trabao y reduciendo e cantidad di cupo di trabao cu nan tin disponibel. E efecto lo ta sigur un cierto mehoracion di productividad, pero nos ta duda si esey ta e berdadero trasfondo di e deseo di mehora salario minimo. Laga nos warda anto trankilamente pa cana e caminda cu ley ta stipula y scucha e consehonan cu mester duna.
Mientras tanto, tin otro asunto relaciona cu salario minimo cu si merece atencion, y no di awor. Esey ta por ehemplo e asunto di e salario minimo pa ora, cu keto bay nos no tin. Nos ta stipula cada biaha un salario minimo pa luna, independientemente si e persona ta traha 40 o 45 ora, loke no ta husto. Introduccion di un salario minimo pa ora lo elimina e problema aki. Tambe tin pendiente e introduccion di un salario minimo hubenil, pa sirbi como estimulo pa hoben keda mas largo na scol y no bay traha tempran, y pio ainda, sin caba scol. Momento pa haci algun reflexion serio; tin tempo pa esey.
