Ayera e ultimo reporte di e tragedia den mercado di pirotecnia di Tultepec na Mexico, a informa di 36 persona cu a muri, a causa di e explosion, asina Alejandro Gomez, titular di Fiscalia General di Husticia di Mexico a informa.
E fiscal di Mexico a bisa, cu 31 persona a muri na lugar di e tragedia y cinco hende mas a muri den hospital, unda nan a wordo traslada.
El a bisa tambe cu nan a haya 3 extremidad, cu nan ta kere ta pertenece na mesun hende”, pero nan ta traha riba estudio pericial, pa confirma e supuesto aki.
E tragedia a sucede diamars banda di 14: 50 ora local na e mercado, cu ta considera como e mercado mas sigur di e sorto aki na Latino America, y cu ta ubica banda di varios autopista, cerca di centro di Tultepec.
E candela a keda controla banda di 17:00 ora. E cuerpo di rescate ta continua cu labor di rescate y tarea di buskeda di curpa, como tambe hiba tur resto di material cu ta na e lugar.
Hopi bisiña a relata cu e onda di explosion a move structura cu ta localisa na 8 kilometer rond di e mercado ey. Nan a bisa cu a mira hopi huma y a tende e zonido di explosion desde e municipionan bisiña di Coacalco, Tultitlan y Cuautitlan.
Jose Manzur, secretario di gobierno di estado di Mexico a señala cu mayoria di curpa ta kima, locual ta haci mas dificil nan identificacion, y por lo tanto a cuminsa haci prueba pericial.
Manzur a detaya cu entre 72 hende lesiona te momento, tin 37 homber, 25 muhe y 10 mucha, kendenan a ser traslada pa hospital cu ta cerca di e mercado di pirotecnia di San Pablito, unda a tuma lugar 6 explosion.
