CBS: Den ultimo 12 luna, 11 di 12 sector a registra aumento di prijs

CBS recientemente a publica informacion di e CPI pa e periodo Augustus 2023 – Augustus 2024.

Indice di Prijs di Consumo

Den e ultimo diesdos (12) luna, e CPI a subi cu 2.9%, unda diesun (11) di e diesdos (12) sector a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Vivienda” (3.0%), “Comunicacion” (6.3%), “Restante bienes y servicio” (3.4%), “Transporte” (2.5%), “Cuminda y bebida no-alcoholico” (2.7%) y “Mobilario” (3.1%) causando un efecto di respectivamente, 0.77, 0.52, 0.40, 0.33, 0.32 y 0.28 ppt. E aumentonan den e restante sectornan a contribui cu un efecto di 0.35 ppt riba e CPI di Augustus 2023 – Augustus 2024.

E aumentonan aki a wordo contraresta parcialmente door di un caida den e indice di e sector di “Recreacion y cultura” (-1.0%), cu a contribui cu un efecto di -0.09 ppt.

E aumento den e sector di “Vivienda” a wordo causa principalmente door di un aumento di 12.7% den e categoria “Mantencion y reparacion di vivienda”, causando un efecto di 0.67 ppt. E aumento den e sector di “Comunicacion” a wordo causa principalmente door di un aumento di 6.1% den e categoria “Servicio di telefon y fax”, causando un efecto di 0.49 ppt. E aumento den e sector di “Restante bienes y servicio” a wordo causa principalmente door di un aumento den e categoría “Otro articulonan personal” (25.7%), causando un efecto di 0.26 ppt. E aumento den e sector di “Transporte” a wordo causa door di un aumento den e categoria “Compra di vehiculo” (13.0%), causando un efecto di 0.53 ppt. E aumento den e sector di “Cuminda y bebida no-alcoholico” a wordo causa principalmente door di un aumento den e categoria “Cuminda” (2.5%), causando un efecto di 0.25 ppt. E aumento den e sector di “Mobilario” a wordo causa principalmente door di un aumento den e categoria “Bienes y servicio pa mantencion ordinario di cas” (4.1%), causando un efecto di 0.18 ppt.

E caida den e sector di “Recreacion y cultura” a wordo causa principalmente door di un caida di 3.2% den e categoria “Vacacion”, causando un efecto di -0.08 ppt. Canasta di consumo Den e ultimo aña cu a pasa 53.7% di productonan den e canasta di consumo di e CPI a conoce un aumento di prijs causando un efecto di 4.11 ppt, mientras cu 36.3% ta mustra un caida di prijs, cu a contribui cu un efecto di -1.24 ppt y pa e restante 10.0% no tabatin cambio den prijs. E indicenan di “Bienes” (3.0%) y “Servicionan” (2.6%) a registra aumento den e ultimo aña cu a pasa, causando un efecto di respectivamente, 1.78 y 1.09 ppt.

Bestaansminimum

Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 150, di Afl. 5,364 na Augustus 2023 pa Afl. 5,514 na Augustus 2024. E aumento aki a wordo causa principalmente door di aumentonan den e sectornan di “Cuminda y bebida no-alcoholico” (Afl. 60) y “Vivienda” (Afl. 48).

Cambio di prijs di petroleo, utilidad, gasolin y diesel

E prijs promedio pa bari di petroleo a conoce un caida di US$ 4.55 (-5.6%) di US$ 81.34 na Augustus 2023 pa US$ 76.79 na Augustus 2024. E indice di Energia a baha cu 1.3% den e ultimo aña y a causa un efecto di -0.22 ppt. E indicenan di “Gasolin” (-4.2%) y “Diesel” (-2.2%) a registra caidanan, causando un efecto di respectivamente -0.22 y -0.01 ppt riba e CPI. E indicenan di “Electricidad” y “Awa” no a registra cambio.

E restante 404 bienes y servicio hunto, a conoce un aumento di 3.8% y tabatin hunto un efecto di 3.10 ppt.

Cambio di prijs di Cuminda y servicio di catering

Den e ultimo diesdos (12) lunanan e indice di “Cuminda & servicio di catering” a subi cu 2.8%. E indice di “Cuminda na cas” a conoce un aumento di 2.7%, unda ocho (8) di e diesun (11) indicenan di e gruponan di “Cuminda na cas” a subi durante e periodo aki. E indice di “Fruta” a conoce un aumento di 7.4%, e aumento mas grandi entre e gruponan di “Cuminda na cas”.

Ademas otro aumentonan significante a wordo registra den e indicenan di “Bebida noalcoholico” (4.6%), “Restante productonan pa alimentacion” (4.3%), “Sucu, jam y otro tipo di cos dushi” (3.6%), “Lechi, keshi y webo” (3.0%), “Pan y otro productonan di grano” (2.6%) y “Carni” (2.0%). E caida mas grandi durante e periodo aki a wordo registra den e indice di “Batata, yuca y batata dushi” (-4.7%). E indice di “Cuminda pafo di cas” a registra un aumento di 3.1% den e ultimo diesdos (12) luna.