Riba proposicion di Banco di Seguro Social (SVb) ministro encarga cu Salubridad Publico ta contempla aumenta e ‘premieloongrens’, esey ta e nivel di salario te unda ta cobra prima, di Afl. 54.600,- te na Afl. 70.000,-. Esaki pa por laga e fondo di seguro aki (ZV) recupera despues di varios aña den problema. Di mes e problemanan cu ta surgi awor tabata di spera, despues cu na 2006 e ministro encarga e tempo ey a baha e prima cu 1.4%, pa uza esaki aki pa aumenta prima di AZV, cu e tempo ey tabata den problema financiero considerabel. Mester bisa acerca cu el a busca y haya apoyo di varios gremio pa haci esaki. Awor na 2015, a bira tempo pa reconoce cu e bahada tabata demasiado y na luga di un surplus manera prome, e fondo ta den cora. Algo mester sucede, esey ta bisto.
Ta constata tambe, corectamente, cu e grado di ausencia pa enfermedad den sector priva, es decir e parti cu ta haci uzo di e fondo pa motibo di AO, no ta halto compara cu exterior. E desastre ta den e avisonan di ta malo den sector publico, cu ta tres biaha mas halto, y manera semper den e tipo di asunto aki, nada ta ser haci pa coregi e rumbo aki. Talbes lo ta un idea pa hinca tur empleado publico bao di SVB y crea un solo control, y laga e reglanan di sector priva conta tambe pa e sector publico, inclusivo cu desde cierto momento nan ta haya solamente 80% di nan salario. Sintamento na cas añanan largo lo caba den un solo tiro!
E otro opcion cu tin ta aumenta e prima, loke lo por bay afecta tur trahado, tambe esun cu e salario mas abao. Consecuentemente, nos ta end up cu e medida aki, pasobra asina e cosnan aki yama, unda e dunado di trabao ta bay carga e peso pa e grupo cu tin salario mas halto cu 70.000 pa aña. Hustifica? Talbes e ta parce asina, cu dentro di varios opcion malo esaki ta aparenta esun menos malo. Fin di discusion? E mandatario a mustra su cara social pa cu e trahado humilde, anto cla?
Por parce asina, pero tin mas pa considera den e asunto aki. Nos ta realisa nos mes cu e medida aki ta pone mas peso atrobe riba nos economia? Pasobra placa pa paga na gobernacion, ta placa cu mester ser gana prome. No ta yega un fin mas na e serie di medida, sorry ‘ahustacion’ cu e gobierno aki ta pone nos dilanti? Nos a bay paga mas pa AZV via BAZV, aunke mester bisa acerca cu a bin rebaho den e prima tambe. E operacion en todo caso a duna gobierno un 80 miyon pa aña cu no mester paga AZV y por lo tanto nan a sali gana ey. E premieloongrens pa AOV den e negociacionnan di algun aña atras tambe a subi di 54.600,- pa 85.000, plus a bay paga 2% mas di prima di AOV, poniendo mas peso riba sector priva.
Tin na caminda un reforma fiscal unda te awe no por duna ningun indicacion si, y acaso cuanto rebaho lo tin den impuesto di entrada como recompensa. No lubida cu na 2007, cu introduccion di BBO, tabatin un rebaho considerabel den e belasting aki, tambe pa e hendenan cu a opone esaki. Di tur manera lo tin un impuesto nobo probablemente pa 1 di januari 2016 (ABB), cu ainda no ta conoci cuanto e lo ta, pero cu sigur no ta bao di 6%. E efectonan di inflacion nos lo conoce despues.
Tin na caminda un impuesto riba transaccion bancario cu mester bay ranca otro 80 pa 100 miyon for di nos economia pa paga pa e locuranan di e proyectonan PPP. Banda di esey a pasa e gastonan di recoge sushi pa e ciudadano o empresa, mester paga pa parkeer auto hasta den zona cu no tin nada di haci cu centro di Playa, manera riba boulevard. Tambe nos a keda pega cu prijs di coriente y awa halto pasobra cu tanto hende studia, nan a lubida di lesa corant of wak riba internet y no tabata sa cu prijs mundial di crudo tabata den collapse… Mala lenga ta bisa cu nan a kere cu un ‘hedge’ necesariamente ta algo ‘berde’, pues bon pa nos.
En todo caso, si e medida aki bira inevitabel, loke por palabra cu sindicato y gremionan empresarial – unda Dialogo Social a keda? – cu mescos e caso di prima di AOV, ora cu e fondo ta core positivo atrobe, por considera disminui e loongrens atrobe pa asina duna algo bek na e empresa y/o trahado. Nos tin miedo si cu di awor pa fin di aña lo no tin mucho tempo mas pa consulta riba diferente asunto, ta bira mas cos di hisa benta, core hiba Raad van Advies y core hiba Parlamento.. Den januari nos por tin un bista riba cuanto ‘casualties’ lo tin riba e campo di bataya aki…
