Den 2016 Dimas a registra un bahada leve pa locual ta trata e peticionnan pa permiso regular. Pero tambe un aumento drastico den e cantidad di peticion pa extension di estadia turistico, mayoria di Venezolano.

E departamento cu ta regla estadia legal na Aruba a registra 4617 peticion pa un extension di e estadia turistico aña pasa. En comparacion cu aña 2015 por papia di un aumento considerabel. Di cual e nacionalidad cu a predomina den 2016 ta esun Venezolano y igual cu e añanan anterior por constata cu un gran mayoria di e peticionnan pa extension di e estadia turistico ta trata di e categoria di turista cu ta keda na cas y bou garantia di un famia.

PERMISO DI ESTADIA
Na 2016 e departamento a registra un total di 14.626 peticion pa un permiso di estadia. Esaki ta poco menos compara cu aña anterior, unda a registra 15.173 peticion pa un permiso di estadia. E reparticion di e cantidad di peticionnan pa un permiso di estadia cu ta relata na trabou compara esunnan cu no ta relata na trabou, no a conoce mucho cambio, si compara e cifranan di 2015 cu esun di 2016. Pa locual ta trata e peticionnan den 2016 cu ta relata na trabou por deduci cu un total di 49,5% ta pa trabou cu pago regular, 21,7% ta pa empleado domestico, y e sobra ta reparti bou otro categorianan.

PROCESO
Dimas ta sigui informa cu segun ley tin un termino di 12 siman di tempo pa procesa un peticion y por extende e termino aki cu 12 siman adicional. Nan a logra den 2016 di contesta 81% di e cantidad di peticionnan pa un permiso di estadia dentro di 12 siman. A aproba un total di 61% di e peticionnan pa permiso di estadia, a desaproba 20 % y e sobra falta ainda pa haya un contesta.

Por nota den 2016 un aumento den e porcentahe di peticionnan nenga pa un permiso di estadia compara cu e añanan anterior. Esaki ta debi na algun factornan entre otro:

  • cu ta constata cu e declaracionnan di conducta no ta na ordo of no por a verifica nan,
  • ta constata cu e personanan pa cual ta pidi un prome permiso ya ta na Aruba caba mientras cu segun maneho nan mester warda contesta riba e prome
  • permiso den exterior
  • ta uza documentonan falso (entre otro payslip) pa comproba un entrada anual cu ta ficticio, falsifica of no ta conforme locual a declara na instancianan
  • gubernamental. Dimas ta bisa cu nan ta verifica y certifica informacion suministra, entre otro cu departamento di impuesto y cu SVb.