Aumento di violencia den futbol Hulandes pa motibo di falta di inversion di clubnan den seguridad, segun estudio

(NLTimes) – Violencia asocia cu futbol, tanto paden y rond di stadion, a aumenta den añanan recien. Investigadornan for di Bureau Beke a conclui cu esaki ta pa motibo cu clubnan di futbol na Hulanda no a inverti significantemente den politicanan di seguridad sino a enfoca riba mas hospitalidad.

E estudio tabata comisiona pa polis Hulandes y a investiga violencia moderno relaciona cu futbol, identificando su fayo y solucionnan potencial.

E autornan di “Van voetbalrellen leren” ta observa cu, prome cu pandemia di Covid-19, varios aña a pasa cu minimo violencia den futbol paden of rond di stadion. Esaki a conduci na negligencia den politicanan di seguridad. E negligencia aki a keda empeora mientras hopi organisacion di futbol profesional (BVO) a enfrenta retonan financiero durante e crisis di Covid-19.

E estudio a inclui feedback di 51 experto di polis. Nan punto di bista a pinta un imagen di confrontacionnan relaciona cu futbol siendo mas violento y extremo cu antes. “Violencia di futbol awendia tin varios caracteristica cu, specialmente ora ta combina, ta pone un gran presion riba organisacionnan di seguridad, particularmente polis,” segun e rapport ta declara.

Un tendencia preocupante ta e emergencia di ‘reclutanan nobo’: individuonan predominantemente jong, mayoria bao 25 aña di edad. “Den termino di ubicacion den e stadion, e reclutanan nobo hopi biaha ta join e ‘ultranan’ cu tin un caracter mas abierto y ta tuma cargo di atmosfera den e stadion. Aki hopi biaha nan ta haci uso di klapchi.” E grupo aki, hopi biaha bisti na preto y usando banner pa sconde esnan cu ta cende klapchi, hopi biaha ta bisti hood of balaclava durante confrontacionnan. Nan ta evita comunicacion cu polis y coordinadornan di seguridad, hasta ora ta aresta y interoga nan.

Algun di esnan entrevista tambe a identifica un vinculo entre sostenedornan di futbol y crimen organisa, sugeriendo influencia indebido riba clubnan y oficialnan di club.

E rapport a inclui varios recomendacion. E principio di “futbol hospitable accesible” mester keda reemplasa pa “futbol safe cu un demanda rasonable riba despliegue di polis.” Medidanan practico por inclui pa posiciona agentenan di polis local den stadion pa identifica hobennan problematico y inverti den tanto e calidad como cantidad di steward. Ademas, mester introduci un sistema cu ta mara ticket di temporada (SCC) na un prueba di identificacion y ta implementa un rekisito di registro pa esnan biahando cu bus di fan pa weganan afo.