E dos compania encarga cu consumo di awa y coriente, ELMAR N.V y WEB Aruba N.V, a bati alarma diamars den oranan di anochi pa loke ta trata consumo di coriente, caminda temperatura halto y crecemento di economia y turismo ta hungando un rol basta importante den esaki.

WEB Aruba N.V mediante un comunicado di prensa a señala cu dia 4 di juni ultimo nan a constata e situacion cu biento lo a cay completo den curso di dia, cu consecuencia cu lo no tabatin suficiente produccion di energia di biento.

Teniendo esaki na cuenta y cu tin unidadnan den mantencion, a dicidi di baha WEB su propio consumo di energia. Ademas WEB mesora a tuma contacto cu diferente consumidor grandi di energia, pa wak kico nan lo por a haci pa baha e consumo mas cu nan por, of pa start nan generatornan, durante e orario pik di diamars atardi/nochi entre 6or pa 10or.

Por bisa cu esunnan cu WEB a acerca a duna tremendo cooperacion y cu nan tambe ta wak e importancia pa e produccion di coriente y pueblo di Aruba keda cu coriente.

Di e forma aki WEB por pasa den e pik sin cu mester interumpi coriente pa asina por cumpli cu demanda.

Dia 4 di juni e demanda pa coriente tabata extremo y riba 156 MW, compara cu 145 MW na mei 2023, entretanto ELMAR a manda un comunicado cu peticion na comunidad en general pa nan cooperacion di usa menos coriente posibel, e aumento drastico den demanda di coriente ta consecuencia di un combinacion di factor manera aumento di temperatura y crecemento di economia y turismo.

Cu e medidanan tuma, WEB ta anticipa y percura pa controla e demanda pa coriente.

Di su parti, ELMAR N.V a haci un apelacion na nan clientenan pa coopera y reduci consumo di coriente rapidamente e dia ey den oranan di anochi, pa asina comunidad coopera pa por mantene e suministro di coriente pa un y tur.

Nan a ricibi e informe for di WEB Aruba N.V. cu tabatin un reserva minimo di produccion di coriente (megawatt) disponibel compara cu e demanda di coriente cu e pais ta rekeri.

Si e demanda di coriente surpasa e limite aki, ELMAR lo mester inicia e proceso di load shedding, load shedding ta nifica cu cierto area lo por experiencia un interupcion di coriente temporal y planea, e tecniconan di ELMAR ta riba stand by.

Esaki ta un problema cu diferente organisacion manera Aruba Birdlife Conservation ta bin treciendo cune por di algun tempo caba, caminda demasiado construccionnan y desaroyo ta bin tumando luga, ademas di exceso di turismo cu tambe ta causa impacto pa aumento di produccion di coriente. Localnan ta esun cu den futuro lo por carga e consecuencianan di sobrepoblacion, unda tambe a ser treci dilanti e situacion di planta di RWZI.

Na februari ultimo, Aruba Birdlife Conservation a solicita na Gobierno di Aruba pa haci un estudio enfoca riba turismo y con su crecemento continuo ta impactando e poblacion local, un estudio realisa for di e perspectiva di e localnan, no for di e perspectiva di industrianan.

“Tur di nos por mira facilmente aworaki, despues di tanto aña, cu algun personanan ta beneficia di crecemento di turismo, pero pa cada biaha nan ta pagando un prijs hopi halto,” nan ta señala.

Nan a realisa pregunta pa nan siguidonan y comunidad en general cuminsa pensa den e consecuencianan cu por trece mas hotelnan nobo, igualmente nan a manda un carta indicando lo siguiente:

Cu profundo preocupacion encuanto e desaroyo sostenible y futuro bienestar di e habitantenan di nos isla stima Aruba, mi ta dirigi mi na bo persona den mi calidad di presidente di ArubaBirdlife Conservation. Ta danki na e buniteza natural di nos isla y e calor autentico di nos comunidad cu Aruba den transcurso di aña a bira un di e destinacionnan mas renombra na mundo. Sin embargo, e actual trayecto di expansion di acomodacion planifica, continuo construccion di hotel y crecemento sin freno y sin regulacion di turismo ta yama preocupacion significante cu ta exigi atencion y accion inmediato di bo persona como liderazgo Arubano.

Danki na varios estudio haci pa loke ta crecemento di turismo den e ultimo decadanan ta mas cu claro pa bastante tempo caba cu e actual modelo di crecemento continuo y no controla den turismo, y e expansion relaciona cu esey di acomodacion y desaroyo di hotel no ta sostenibel, ni a corto, ni mediano ni a largo plazo. E resultado di e modelo (obsoleto) di crecemento pa turismo aki ta destrui e patrimonio hopi special – nos medio ambiente natural, nos harmonia social y integridad cultural – cu ta haci Aruba unico. Ademas ta reconoci caba cu e trayecto aki di crecemento turistico continuo ta conduci na un reduccion di e calidad di bida di e habitantenan di nos isla y p’esey finalmente ta haci daño na e experiencia di e bishitante cu ta elemento central den nos industria turistico.

Den e cuadro aki mi ta pidi bo respetuosamente pero cu urgencia pa, segun encargo di e pais laga ehecuta un estudio amplio, integral y multidisciplinario encuanto e impacto di continuacion di construccion di hotel y expansion turistico na Aruba. E necesidad di un estudio asina ta ser enfatisa pa e caracter compleho di e impacto di expansion turistico cu mester comprende, cu ta encera dimension economico, ecologico, social y di infrastructura. Un acercamento integral y a largo plazo ta esencial pa por haci visibel e efectonan compleho y variable segun tempo.

E obhetivo primario di e estudio proponi ta pa evalua efecto directo como indirecto riba tereno socio-economico y medio-ambiental, di e continuacion di construccion di hotel. Ta importante pa den esey traha cu varios indicador obhetivo y normanan cientifico. E estudio idealmente lo mester atrae experto di diferente tereno profesional, entre nan economia, urbanismo, sociologia, salubridad publico y mas, pa por garantisa un analisis holistico. Ta di esencial importancia cu den e estudio aki no ta investiga solamente e efectonan a corto plazo, sino cu ta atende tambe e efectonan indirecto a mediano y largo plazo y e implicacionnan di un ‘segundo ola’. Un tal acercamento amplio ta di vital importancia pa por comprende e gama completo di consecuencia cu nos actual modelo di turismo ta ocasiona.

Manera e carta ta indica lo ta bon si por logra haci e estudio aki y asina por midi e impacto cu esaki lo por tin pa diferente sector manera infrastructura ya cu esey tambe ta afecta den consumo di coriente no solamente pa hendenan local sino pa turistanan tambe.