Hubert Dirks di un di e importadonan di combestible principal na Aruba ta mira e periodo nos dilanti cu hopi bista skerpi. E anuncio di aumento di tarifa pa productonan di China, Canada y Mexico cu ta drenta Merca tin hopi comerciante rond mundo, y sigur na Aruba ta planea strategianan pa mitiga cualkier aumento drastico den prijs. Pasobra “si Merca niester, nos lo haya verkoud,” segun Dirks.

Manera ta conoci, presidente electo Donald Trump a anuncia aumento di tarifa di 25 porciento di tur producto procedente di Mexico y Canada, y otro 10 porciento adicional di locual tin caba riba importacion di productonan for di China. E medidanan lo ta retaliacion pa e cantidad di migracion cu ta sosode na e fronteranan, ademas di e fluho di droga, particularmente fentanyl. Ta trata di e tres partnernan comercial mas grandi di Merca, cu ta entrega hopi biaha e base pa otro produccion Mericano. Canada ta e exportado mas grandi di gas y petroleo pa Merca, mientras cu Mexico ta exportado di auto y pieza di auto. China di su banda ta exportado di electronico manera smartphone y laptop. Merca tin un asina yama ‘trade deficit’ unda e ta importa mas cu ta exporta, algo cu Trump ta considera inacceptabel. Esaki a pesar cu no tur economista ta haya cu esaki ta algo malo, e presidente electo ta kere cu tarifanan lo yuda e desbalansa aki. Sinembargo, e transicion pa manufacturacion na Merca ta tuma tempo y ta sumamente costoso.

“Mas ainda si tene na cuenta cu China ta subsidia su industria. Gobierno di China genera coriente y ta pasa esaki sin costo adicional pa su sector industrial cu por produci cu hopi menos gasto,” segun economista Randall Croes. “Dificil cu e sector industrial na Merca por competi cu e prijs di coriente y labor di China.” Aunke Croes ta mira e menasa di aumento di tarifa mas bien como un arma pa cera e fronteranan pa inmigrante, realidad ta cu China ta preparando caba pa yega na otro mercado sin cu mester pasa via Merca. “China a traha un puerto di mas di un biyon dollar na Peru cu ta habri porta pa exportacion mas facil di otro paisnan Sur Americano. Y Aruba lo por probecha di esey.”

Frans Ponson di DoIt Center cu ya caba ta treciendo producto for di Colombia sinembargo ta mas cauteloso y ta pendiente di kico e proveedornan na Miami lo por haci. Si prijs na Merca subi, na Aruba e lo ta e caso tambe. En todo caso, ta premira si cu productonan di Merca lo bira mas caro. Idealmente, pa por mitiga e efecto pa consumidor na Aruba ta si ASTEC y APA por ahusta nan prijs pa baha gasto. Pero Ponson no ta mira esaki como algo cu ta bay sosode. “Di otro forma ta imposibel pa limita e impacto di aumento di prijs na Merca. Si webo, appel subi na Merca, el a subi pa nos tambe. Nos no tin poder riba prijs na Merca. Si tur e prijs di fruta cu ta drenta Merca ta subi, nan lo subi pa nos tambe. Unicamente si e companianan na Miami busca solucion pa ‘bypass’ e aumento di tarifa, nos lo por scapa. Pero si prijs subi na Merca, prijs lo subi pa consumidor na Aruba.”

Busca producto di otro mercado ta keda un posibilidad, segun Ponson, pero atrobe, “un pais manera Republica Dominicana ta bende un container di un producto, por ehempel awacati. E facilidad di busca na Merca ta e consolidacion. Pasobra nos no por busca un container di lamunchi. Merca ta cumpra 20 container y ta percura pa distribucion.” Frans Ponson ta kere cu e otro opcion ta si tur importado na Aruba cumpra hunto “pero e colaboracion na Aruba no ta asina leu ainda. Esey ta e problema y beneficio pa traha cu Merca.”

Mientras cu pa DoIt e ta dificil, Ponson ta reconoce cu pa un compania manera Compra, e ta mas factibel pa cumpra comestibel na otro pais cu no ta Merca. Y ta netamente esey ta locual Compra ta haciendo tambe, segun su Director. “Compra ta trahado riba un alternativa grandi, y busca otro exportado mas lihe posibel, pasobra nos mester amplia e opcionnan.” Compra ta enfocando riba Colombia, Chile, unda por trece producto via Baranquilla, y ta trahando riba e plan caba cu ta bay ta beneficioso pa consumidornan. E transporte lo sosode pa medio di e asina yama RoRo Charter, cu ta un servicio di transporte di carga. “Si e logra, y mi ta convenci cu e lo logra, lo tin un era nobo pa Aruba,” Hubert Dirks a bisa.

Randall Croes di su banda tin tur confianza cu comerciantenan di Aruba lo sa di confronta y surpasa e reto nobo aki. “Comerciantenan di Aruba semper a traha inventivo y a busca solucion. No ta por nada cu inflacion na Aruba tabata esun mas abou di henter region, danki na e trabou di comercio. “Esey semper a scapa Aruba,” ta e conclusion di Randall Croes.