E aumento di sueldo minimo di un 2.5% cu a drenta na vigor entrante 1 di januari ultimo ta un echo positivo y importante pa e clase trahado, asina presidente di FTA, sr. Hubert Dirksz a yega di manifesta na Bon Dia Aruba.
E dirigente di un di e organisacion sindical mas grandi di Aruba a señala cu si nos no ta tene cuenta cu e desaroyo di e pais, e poder di compra ta keda atras poco poco.
“Na momento cu un pais su economia ta progresando, su GDP ta crece y bo tin un inflacion cu ta duna bo espacio pa aumenta e salario”, el a bisa.
Den e caso aki, FTA a ripara cu e salario minimo a keda atras un par di tempo. Nan sa tambe cu tabatin na Aruba un aumento di inflacion masha minimo. Esaki a wordo evalua tambe conhuntamente cu e desaroyo economico y espacio cu economia ta duna ta, cu esaki por duna pa cubri e atraso cu e trahado a keda sin conoce un aumento di e salario minimo.
Crea un balans
E ta haya cu e forma pa bo por crea un balans y yuda e trahadonan di mas necesidad ta aumenta e salario minimo. Pues e ta kere cu ta na su luga cu e aumento di un 2.5% di salario minimo a drenta na vigor.
“Nos ta contento pa esaki. Nos ta kere cu esaki por lo menos lo por yuda pa e trahado den mas necesidad tin un nivel mas halto den bida, y nan poder di compras ta un poco mas fuerte…”, el a bisa.
Iniciando un aña nobo 2016, presidente di FTA a bisa cu e aña aki locual nos mester yega na dje ta un balans. E ta enfatisa cu nan sa cu e trahado su poder di compras no por bay atras. Nan sa tambe cu e trahado su nivel di productividad mester keda halto. Esey ta nifica cu bon productividad ta yuda pa logra un poder di compras, pasobra e por adkiri tambe e probecho y beneficio cu economia ta duna.
Na Aruba su entrada per capita ta halto, sinembargo no ta tur trahado ta disfruta di entrada halto cu Aruba tin, el a laga sa. FTA sa cu gran parti di e comunidad y forsa laboral ta gana un salario bou, y cu di e forma ey, nos no por tin un calidad di bida pa tur hende riba e pais aki.
Meta pa 2016
Pa 2016, e organisacion sindical FTA ta kere cu e tarea mester ta pa un siguridad social stabiel. Nan ta consciente cu tin problema na nivel di AZV y tambe na nivel di e fondonan di pensioen, y nan ta kere cu ambos mester keda stabiel.
FTA ta kere tambe cu pa e otro desaroyo social pa loke ta e fundacionnan, y e servicionan di gobierno, e problema di nos hobennan, nan ta aspectonan cu mester wordo atende debidamente durante 2016.
Sr. Dirksz a duna importancia na e aspecto di poder di compras, ya cu esaki mester wordo salvaguardia. Esey ta loke sindicato FTA lo trata pa haci, no solamente pa medio di contracto colectivo (CAO), pero pa medio tambe di relacionnan cu nan tin cu tur sindicato y cu e dunadonan di trabou, politiconan y gobierno di Aruba.
