(CuraçaoChronicle) – For di dia 1 di januari ultimo, salario minimo na Corsou a aumenta cu 11.2%, di 9.62 florin pa 10.70 florin pa ora.
Curaçao Hotel and Tourism Association, CHATA ta nota cu ultimo biaha cu a ahusta salario minimo tabata na 2018 y esaki no a aumenta den añanan di pandemia. Ta nota tambe cu CBS Corsou ta reporta cu inflacion a crece 18.9 porciento entre october 2018 y october 2022, e luna mas actual pa cual tin data disponible, y pa e motibo aki un aumento tabata hustifica pa contraresta e aumento substancial den costo di bida pa mayoria di e poblacion cu ta depende riba salario minimo. Pues pa e motibonan aki CHATA ta kere cu un aumento ta rasonable y inevitable.
Sinembargo, CHATA ta adverti gobierno cu hopi di su miembronan, particularmente negoshinan chikito, ainda ta luchando pa recupera for di impacto di e pandemia.
Consecuentemente, CHATA ta solicita pa gobierno considera duna asistencia na negoshinan chikito door di implementa accionnan cu ta baha e costo di haci negoshi – cost of doing business. Por ehemplo, reduci impuesto riba importacion, gasto di waf, y electricidad. Pa implementa leynan nobo di labor hunto cu un politica menos restrictivo pa emplea trahadornan stranhero, cual lo permiti sector di hospitalidad opera mas eficientemente y permitie pa bira mas competitivo.
E ultimo punto aki ta echo e declaracion di Banco Central, cu ta recomenda pa economia di Corsou bira mas resiliente pa shocknan economico, y cu mester aumenta e productividad di economia local.
CHATA ta desea di recorda gobierno cu sector turismo ta e futuro pa Corsou y cu yuda e sector bay dilanti den un manera productivo y eficiente ta bay ta altamente beneficioso pa e pais, gobierno y poblacion en general.
