Siman pasa Aruba a conoce un aumento substancial den prijs di gasolin, diesel y kerosin den loke ta parce un sin fin di aumento pa loke ta trata diferente producto na pais Aruba. Prijs di pan na Aruba tambe a conoce un aumento recientemente y tur esaki ta wordo atribui na efectonan di e pandemia COVID-19 y e conflicto cu tin actualmente entre Rusia y Ucrania.

Minister di Asuntonan Economico, Comunicacion y Desaroyo, Geoffrey Wever, a splica durante un conferencia di prensa diamars ultimo cu Aruba no ta produci practicamente ningun producto y mester cumpra riba mercado internacional basa riba e prijs internacional na momento di compra.

El a enfatisa cu mundialmente e pandemia, y ultimamente e conflicto entre Rusia y Ucrania a crea un presion grandi ariba prijs di cuminda y energia y esaki na su luga ta pone presion ariba Aruba, como un isla chikito cu ta depende primordialmente di productonan importa.

Data cu Minister Wever a cita ta mustra cu prijsnan den luna di maart 2022 ta 34% mas halto compara cu luna di januari 2022. Un desaroyo cu ta demostra un aumento grandi riba e prijs di petroleo y su impacto ariba productonan pertrolero.

Pa loke ta trata e posibilidad di subsidia of absorbe un parti di e aumento di prijs di gasolin, Minister Wever a indica cu el a propone un ahustacion di structura di prijs na CAft pa wordo aproba. Mirando cu Aruba ta depende di sosten di likides di Hulanda ainda, conseho di CAft ta importante riba e tema aki.

Di otro banda, pueblo ta esun cu mas ta sinti e efectonan di e aumento di prijs di productonan aki fuertemente. Reportero di Bon Dia Aruba a acerca algun ciudadano pa nan opinion ariba e aumento di prijs di gasolin y con esaki lo afecta nan presupuesto di tur luna.

M. Padron, un hoben adulto, a expresa cu e aumento aki ta uno cambio duro p’e personalmente. El a splica cu e ta traha den e area di benta ariba caya y ta usa su auto tur dia pa traha.

“E prijs a subi hopi y na final di dia e ta un sla duro pa mi personalmente pasobra mi ta traha den sales, ariba caya y mi tin mester di mi auto pa mi por move bishita cliente etc. Mi no tin otro opcion. Aunke mi trabao ta duna mi un cantidad fiho tur luna pa gasto di gasolin, cu e aumento aki, e cantidad ey mi ta duda cu e ta bay yega”, el a indica.

Di otro banda Padron ta preocupa cu gasolin ta keda subi y esaki ta afecta tur otro producto tambe na Aruba. “Costo di bida ta birando carisimo na Aruba y e salario ta yega pa cubri gastonan necesario solamente”, el a bisa.

“Cuminda a bira mas caro, gasolin a subi, pan tambe a subi di prijs, webo no ta cos di mira. E cosnan basico cu antes mi por a cumpra cu 10 florin trankil aworaki mi mester minimo 25 florin pa por cumpra nan”, el a agrega.

Otro ciudadano preocupa, J. Fernandes, a splica cu e subida di prijs di gasolin y diesel lo afecta su presupuesto mensual bastante. “Mi auto ta diesel y 45 cen ta un aumento basta grandi. Mi no ta usa mi auto pa traha precies, pero mi ta usa mi auto pa bay trabao, bin cas, hiba y trece mi yiunan y haci diligencianan”, el señala. “Antes mi por a yena mi auto cu 80 florin, pero aworaki mi ta pasa 100 florin trankil, locual no ta dura mi ni un siman completo”.

Ciudadano J. Oduber a conta cu e tambe ta preocupa no solamente pa e aumento di prijs di gasolin, pero e aumento di diferente producto en general.

“Ta parce cu ta puro subi prijsnan ta keda subi y nada di baha. Gasolin a subi y prijs di kipashi tambe a subi, awo ta con nos ta haci pa sobrevivi cu salario minimo? Awendia un auto no ta un luho mas, un auto ta un necesidad, si prijs di gasolin sigui subi nos no por core auto mas, bais mester bay busca, bira mescos Hulanda”, el a comenta.

Di otro banda tin ciudadanonan, cu aunke nan no ta di acuerdo cu un aumento asina substancial den e prijs di gasolin y diesel, nan ta pensa cu mester djis adapta pasobra no ta un efecto cu Aruba so ta sintiendo, pero henter mundo tambe.

“E ta fastioso berdad cu prijs ta subi, pero nos no por haci nada, nos mester adapta y sigui biba. E crisis aki no ta akinan so bo ta sintie, pero na full mundo tambe. E subida di prijs di gasolin ta algo cu ta afecta tur pais na mundo y tin caminda cu tine pio cu nos. Pero nos mester adapta y purba di reduci gasto lo mas cu nos por”, e ciudadano, cu a pidi pa keda anonimo, a indica.