Minister Angel Bermudez di Labor ta bisa cu e aumento di peticion di personanan di afo solicitando pa un trabao na Aruba, no tin di haber directamente cu e refineria/Citgo.
E minister ta splica cu nan ta cay den un ‘otro grupo’ pa motibo cu gobierno a cera un protocol cu Citgo pa den e fase di rehabilitacion lo por trece trahadonan di afo temporalmente.
Den e fase aki nan mester bin cu expertonan pa yuda den e trabou di rehabilitacion aki pa pone e planta den operacion. Pero despues e refineria mester di un cantidad di trahado cu mester opera e refineria mas structural.
“Ta asina cu mas tanto posibel ta recluta localnan”, e ta splica.
Sinembargo e minister ta haya cu no lo bay tin suficiente hende local cu e capacidad of competencia pa atende e demanda di trahadonan cualifica pa traha den e refineria. A base di esey, e protocol ta wordo aplica den cual nan ta evalua con e demanda di e tipo di trahado capacita nan lo soluciona. Den e caso cu mester tuma trahadonan di afo, nan ta mara na un permiso pa un periodo temporal, te ora cu e fase di rehabilitacion ta bin cla cu ta wordo calcula cu lo ta na final di 2018.
