Pago cu debit card ta bira mas caro entrante april. Ya caba Comerciantenan Uni a expresa preocupacion pa mas gasto cu tin su efecto inflacionario. E gasto pa usa debit card ta varia di dos a cuater porciento y mescos cu BBO, lo tin efecto grandi pa negoshi y cliente.
Di otro banda, placa contante of ‘cash’ ta algo hopi comun na Aruba ainda. Y aumento di gasto pa transaccion ta pone mas y mas hende pensa di keda usa ‘cash’ pa pago. Ya caba algun negoshi na Aruba no ta tuma carchi, esta debit card, pa motibo cu e mashin ta trece su gasto cune y pa empresarionan sin mucho forsa financiero, cada cen ta conta.
Particularmente pa negoshinan chikito cu ta traha cu un margen chikito, cualkier gasto adicional ta nifica menos entrada. Y pa algun, ya e no ta un opcion pa scohe pa cash sino necesidad.
Segun Pierre Rafini di Aruba Bankers’ Association, Mastercard, e compania cu pa mas di 30 aña tabata brinda e servicio di Maestro, a dicidi di stop pa motibo di demasiado ‘skimming,’ esta cu ta horta caheronan automatico. Maestro tabata e prome debit card basa riba POS, cu ta point of sale. Tabatin como 400 miyon carchi di Maestro rond mundo, particularmente na Europa. Segun e compania Mastercard mes, Maestro ta un producto di su tempo, basa riba comercio tradicional, unda compranan ta den persona. Rond mundo, y Europa sigur, no por a usa Maestro pa compranan ‘online.’ Consecuentemente Mastercard a conclui cu no por brinda un producto optimal pa e comercio nobo, cu ta digital y como cu e plataforma pa credit card ta mas grandi, a dicidi pa mara e debit card na e network di credit card. Y aunke Maestro tabata di Mastercard, awor VISA tambe ta ofrece e servicio di debit card, bou condicionnan similar. Na Aruba, algun banco a scoge VISA como su debit card y otro a scoge pa e plataforma di Mastercard.
Esaki tin su consecuencia pa Aruba y comercio local, cu contrario na paisnan grandi, no ta depende di comercio digital. Mayoria negoshi na Aruba ta ‘den persona.’
Caribbean Mercantile Bank tin su carchi di credito na florin. E ta funciona manera cualkier ‘credit card,’ pero ta obvio cu ta solamente pa uso na Aruba. E interes ta similar tambe cu cualkier credit card, pero, aki no ta paga e gasto di divisas, cu ta e caso na momento cu ta paga un credit card regular. E banco no ta brinda un debit card na florin. A informa Bon Dia Aruba cu ta buscando forma pa mira si por amplia e servicio di debit card, pero cu e no ta algo facil.
Un otro forma di pago ta Pay.aw di Setar. E app tin un poco mas di cinco aña ta funcionando y a crece organicamente, y ta inclui servicionan comparable cu Venmo (Merca) of Tikkie (Hulanda). Tin mas di 9000 usuario segun cifranan di februari. Pay.aw no ta cay bou supervision financiero di Banco Central di Aruba, pero mester cumpli si cu rekisitonan legal pa por controla, evalua particularmente e negoshinan cu ta acepta e pagonan di Pay.aw. Ta raporta si den liñanan grandi a base anual.
Segun Greg Tromp kende ta maneha Pay.aw, “nos a scoge e suma maximo cu usuarionan por tene den nan asina-yama ‘subscriber wallets,’ cu ta e suma di 350 florin.” E decision aki ta delibera ya cu esaki a permiti cuminza sin un licencia di antemano. E propio ley di supervision di Banco Central di Aruba ta permiti esaki, i.e. Afl. 350, deliberadamente pa nos no mester tin un licencia for di cuminsamento. Esaki ta un posibilidad cu e ley di supervision di CBA ta duna.
“Nos ta biniendo cu un servicio cu ta permiti inicialmente haci pagonan cu Pay.aw directamente for di bo ‘linked bank account’. E lo ta posible pa usuarionan di Pay.aw – Aruba Bank. Nos ta spera cu pronto lo nos tin otro banco conecta directamente.” E gasto di transaccion pa pagonan via e asina yama QR-code scan na un cahero ta bou un (1) porciento y segun Tromp, e comerciante cu ta acepta Pay.aw ta paga pa e costo aki.
“Den e clima di aumento drastico di transaction fees door di banconan/MasterCard y Visa Debit, Pay.aw ta bira un opcion di pago local cu por keda mantene e costonan na un fraccion di esnan via banco, ya cu nos no ta depende di servicionan di tercer partido/intermediario pa nos completa pagonan. Naturalmente, Pay.aw ta mas cu simplemente pago, nos ta un ‘Payment Enabled Mobile-Marketplace.’” Den otro palabra e ta facilita pagonan digital na negoshinan cu ta ofrece e-commerce. “Pay.aw su meta ta inclusion financiero y pues ta disponibel pa tur usuario (y proveedor) di servicionan mobil y cliente cu un cuenta bancario na tur banco na Aruba,” Tromp a bisa, agregando cu no mester di un cuenta bancario pa haci uso di e app.
Banda di Pay.aw, tambe tin e otro app, Sentoo.me cu CMB y Aruba Bank a cuminza usa.
A acerca algun comerciante (chikito) pa nan pensamento, cu manera Sr. Frans Ponson di CUA a ilustra recientemente, no kier a bin publicamente dilanti. Algun tin e swipe machine pero ta considerando si lo sigui cune, mientras cu otronan no tabatin swipe machine for di algun tempo caba pasobra no tabata dispuesto pa paga pa e huur. Tur ta traha cu placa cash.
Di otro banda, si algun negoshi cu si ta bay adapta nan prijs pa cubri e gasto, e pregunta ta si hasta esnan cu ta paga cu ‘cash’ finalmente toch ta bay comparti e peso di mas gasto.
Bon Dia Aruba a manda un serie di pregunta pa Banco Central di Aruba y ta pendiente pa e contestanan.
