Minister di Turismo, Dangui Oduber por wak caba cu turismo keto bay ta creciendo gradualmente. Sinembargo ainda nan no por pronostica con turismo lo bay den luna di december y januari.
E mandatario ta wak con e casonan di Covid ta subiendo exponencialmente na Merca. Obviamente – segun e mandatario – ora cu e casonan ta subi na Merca e tin consecuencia pa Aruba. Nan ta monitoriando e situacion aki.
A pesar cu gobierno a dicidi di flexibilidad algun reglanan durante e temporada di Pasco y Fin di Aña venidero, comunidad ta cuminsa wak cu preocupacion cu e cantidad di casonan a cuminsa scala. No solamente e casonan registra localmente sino e casonan di Covid positivo importa.
Despues di registra menos di 10 caso positivo pa dia y menos cu 100 caso activo, por ehempel diasabra ultimo a wordo registra 25 caso nobo riba un dia so, di nan 22 residente y 3 no residente. Pa un total di 124 caso activo. Mientras cu ayera DVG a raporta un total di 5 caso nobo di cual 3 tabata no residente pa un total di 114 caso activo.
